Американскиот претседател Барак Обама ги повикал рускиот претседател Владимир Путин во текот на кусата неформална средба во петокот во Франција да ја искористи можноста за ублажување на тензиите во Украина по изборот на Петро Порошенко за нов украински претседател, чија позиција околу судирот во југоисточните региони добила поддршка од Путин во текот на сличната средба во Довил на маргините од 70-годишнината од сојузничкото истоварување во Нормандија во Втората светска војна.

„Претседателот Обама јасно рече дека смирувањето на ситуацијата зависи од Русија, од нејзиното признавање на Петро Порошенко за легитимен челник на Украина, престанување на поддршката на сепаратистите (како што западот ги нарекува проруските бунтовници кои не ги признаваат прозападните власти во Киев- з.р.) во источна Украина и запирање на прекуграничното снабдување со оружје”, соопштил заменикот советник за национална безбедност на американскиот претседател, Бен Родес за новинарите кои ја следеле посетата на Барак Обама на Нормандија, пренесe Reuters.

„Доколку Русија ја искористи таа можнсот за признавање и соработка со новата влада во Киев, претседателот Обама даде знаци дека би можеле да се создадат можности за намалување на тензиите”, додал советникот на американскиот претседател.

Белата куќа и Кремљ претходно во петокот преку своите претставници во францускиот град Довил за новинарите го потврдија кусиот разговор меѓу Обама и Путин.

„Станува збор за неформална конверзација, а не за официјална билатерална средба”, рекол Родес додавајќи дека средбата траела десет до петнаесет минути.

Тоа беше првата средба меѓу челниците на двете земји од избувнувањето на украинската криза и особено откако црноморскиот полуостров Крим се присоедини на Русија, што Западот го смета за руска анексија на украинска територија.

Од своја страна Владимир Путин кој, исто така, имаше средба со неодамна избраниот украински претседател, рече дека не може а да не се поздрави позицијата Петро Порошено за итно прекинување на крвопролевањето во источна Украина, а покрај тоа, според рускиот претседател на преговорите мора да учествуваа властите во Киев и поддржувачите на федерализацијата (како што Москва ги именува проруските бунтовници во југоисточна Украина -з.р.), а не Русија , бидејќи таа не е вклучена во конфликтот.

„Не можам а да не ја поддржам позицијата на господин Порошенко околу тоа дека е неопходно да се прекине крвопролевањето во источна Украина. Тој има план во овој поглед. Но, каков е тој план, за тоа е подобро да не ме прашувањето мене, туку него. Тој кусо зборуваше за тоа, но една работа е да се каже тоа тука, во Франција, а сосема друга работа е тоа да се изложи во сопствената земја”, изјавил Путин за новинарите, пренесе РИА Новост.

„Уште еднаш ќе потцртам дека партнери во преговорите не треба да бидат Русија и Украина, Русија не е инволвирана во конфликтот, туку киевските власти и поборниците на федерализација на истокот. Како сето тоа ќе биде имплементирано, како сето тоа ќе оформено, со сигурност не можам да кажам, но ставот како целина ми се чини исправен, ми се допадна”, додал Путин.

Рускиот претседател, исто така, истакнал дека доколку успешно бидат реализирани плановите „ќе бидат создадени услови и за развој на нашите односи и во другите области, вклучително и во економијата”./крај/мф/сн