Израелско-палестинската „молитвена” средба заврши во неделата навечер со свечена церемонија Ватиканските градини, каде маслинови дрва на мирот засадија израелскиот претседател Шимон Перес, неговиот палестински колега Махмуд Абаз, папата Франциск кој воедно беше и иницијатор и домаќин на оваа средба без преседан, како и Константинополскиот патријарх Вартоломеј.

По молитвите на свештениците од трите религии, се обратија главните учесници на римската средба, папата и двајцата претседатели. Папата Франциск изјави, меѓу другото дека „за градењето на мирот потребно е повеќе храброст, отколку за започнување војна”. Покрај тоа, поглаварот на римокатоличката црква повика на обновување на мировниот процес во Светата земја, изразувајќи надеж за „возобновување на христијанското единство”.

„Потребна е храброст за да се каже ‘да’ за преговорите и ‘не’ за непријателствата, ‘да’ за почитување на договорите и ‘не’ за провокациите, ‘да’ за искреноста а ‘не’ за дволичноста”, рече папата Франциск.

Папата претходно на Перес и Абаз им ги пренесе своите желби да одговорат на тежнеењата на своите народи за мир на Блискиот исток, како и да „изнајдат сили за дијалог”.

„Барањето мир е врвна одговорност пред нашата совест и нашите народи. Ова беше средба која одговара на желбите на сите оние коишто тежнеат кон мир и сонуваат за свет во кој мажите и жените можат да живеат како браќа и сестри, а не повеќе како противници и непријатели. Светот е наследство коешто го добивме од нашите предци, но и дар за нашите деца, децата кои се заморени и исцрпени од судирите и сакаа да осамне утрото во кое ќе дојде мирот. Премногу синови паднаа, невини жртви на војната и насилствата…, нашата задача е нивната жртва да не биде попуста”, изјави Папата.

Една од желбите на папата со оваа средба беше да покаже дека трите монотеистички религии имаат заеднички корени и мораат заедно да дејствуваат во полза на мирот, оценуваат во понеделникот светските медиуми.

Израелскиот претседател Шимон Перес, кој има 90 години и следниот месец му престанува мандатот, од Ватикан ги повика Палестинците и Израелците на „мир меѓу еднаквите”, нагласувајќи дека „нашата мисија е да им донесеме мир на нашите деца”. „Можеме, заедно и сега, Израелците и Палестинците, да ја претвориме нашата возвишена визија во стварноста на благосостојба и напредок. Во наша моќ е да им го донесеме мирот на нашите деца. Тоа е нашата задача, нашата света мисија на родители”, изјави Перес, кој инаку е добитник на Нобеловата награда за мир.

Палестинскиот претседател Махмуд Абаз упати молитва за „сеопфатен мир во нашата земја и регион, така што нашите народи и народите на Блискиот исток и во целиот свет ќе можат да уживаат во плодовите на мирот, стабилноста и соживотот. Сакаме мир за себе и за нашите соседи”, рече.

Израелскиот премиер Бенјамин Нетанјаху, кој е клучниот израелски политичар, на ниеден начихн не беше поврзан со молитвата за мир, но во својата изјава во неделата навечер во полициската база во близина на Ерусалим изјави дека молитвата не е замена за безбедноста.

Молитвата за мир започна во 19 часот по локално време, и заедно со кусите обичаи, траеше околу два часа, а беше триделна – хебрејска, христијанска и муслиманска. На неа се придружија и свештеници од двете христијански конфесии, имами, рабини и верници. Молитвата беше одржана во надворешен простор, а не во црква, за да се избегне каква и да е верска симболика, и имаше срдечни поздрави, а од истите причини беше решено молитвата да има три дела, наместо да биде единствена за сите.

Оваа историска средба се случи во екот на кризата на мировниот процес и недовербата меѓу израелската и палестинската страна, откако беше формирана владата на палестински национално единство по помирувањето меѓу ривалските фракции Фата, на Махмуд Абаз, и исламистичкот движење Хамас кое Израел го смета за терористичка организација и за одмазда ја забрза изградбата на еврејски населби на териториите коишто меѓународната заедница ги смета за окупирани палестински територии.

Сепак, за време на неодамнешната посета на Светата земја, кога во мај папата Франциск ги повика Перес и Абаз на заедничка молитва во Ватикан, папата инсистираше дека не станува збор за политичко вмешување во Блискиот исток, порачувајќи дека би претставувало „лудост” доколку тој би изнесувал мировни предлози.

Перес и Абаз важат за умерени политичари коишто не ги прифаќаат екстремистите кај своите народи, па оттаму ниту иницијативата на папата, како ниту неговата посета на Светата земја не наидоа секаде на разбирање и одобрување./крај/мф/сн