Меѓународната организација за човекови права Amnesty International (AI) ги обвини во вторникот сириските бунтовнички опозициски групи во Сирија за грабежи, убиства и измачувања, и ги повика Турција, Саудиска Арабија, Катар и САД да им ја прекинат својата поддршка.

Споменатата меѓународна организација со седиште во Лондон ги издвојува особено групите кои се активни во северните покраини Алепо и Идлиб „кои ја имаат поддршката од Катар, Саудиска Арабија, Турција и Соединетите држави“, пренесува агенцијата AFP.

„Во Алепо и Идлиб вооружените групи денес имаат одврзани раце неказнето да извршуваат воени злосторства и други кршења на хуманитарното меѓународно право“, вели Филип Лутер, директор на програмата на Amnesty International за Блискиот исток и Северна Африка.

„Голем број цивили живеат во постојан страв да не бидат киднапирани доколку го критикуваат однесувањето на вооружени групи или не ги почитуваат строгите правила коишто тие ги наметнуваат“, додава Лутер, кого го цитира Reuters.

Во овој нов извештај Amnesty предупредува „на грозниот бран грабнувања, измачувања и самоволни погубувања“ кои ги оценува како „воени злосторства“.

Таквите злосторства им се припишуваат на гушите Џебхат ан-Нусра, сирискиот огранок на Ал Каеда, и на другите бунтовнички групи како салафистичката Ахрар ал-Шам која е поддржувана од Саудиска Арабија, Нуредин Зинки, Фронтот Левант, Дивизијата 16, кои се дел од сунитската исламистичка коалиција „Фатах Халаб“ (Ослободувањето на Алепо).

Неодамна рускиот министер за надворешни работи Сергеј Лавров изјави дека, Вашингтон, кој често ја обвинува Русија дека ги бомбардира таканаречените „умерени“ бунтовнички сили во Сирија, побарале во Москва да ги запре бомбардирањата врз позициите на Џебхат ан-Нусар. Лавров, исто така, рече дека САД го одбиваат рускиот предлог групата Ахрар ал-Шам да биде ставена на листата терористички организации на ОН, потсетуваат во вторникот руските агенции коментирајќи го извештајот.

Американскиот институт за проучување на војната во февруари годинава во својот извештај за опозициските групи коишто дејствуваат во северната сириска покраина Алепо напиша дека споменатите три организации примаат или примале американска воена помош, потсетува агенцијата DPA.

Во мај годинава беше објавено дека Лабиб ал-Наххас, кој себеси се нарекува „министер за надворешно-политички односи на Ахрар ал-Шам“ добил дозвола да престојува во „работна посета“ на САД каде што отпатувал „со пасош издаден од една европска земја“.

Судирите во Сирија започнаа во март 2011 година по инерција на ткн Арапска пролет во која во арапските муслимански земји беа соборени децениските владетели и како наводен бунт против претседателот Башар ал-Асад, кој доаѓа од алавитската (шиитка) заедница. Асад од почетокот ги обвинуваше споменатите сунитски монархии и Турција дека преку нивните тајни служби и со вооружување на сунитските исламисти ја започнале војната во Сирија којашто набрзо се претвори во етноконфесионален судир со досега најмалку 400.000 жртви и милини раселени, во кој се вмешаа отворено и големите регионални и светски сили.

Amnesty набројува „најмалку 24 случаи кои ги извршиле споменатите вооружени групи во периодот меѓу 2012 и 2016 година“ чија цел биле „борци за мир, па дури и деца“, како и припадници на верските и етничките малцинства, како Курдите и христијаните, вклучително и свештеници и монаси.

Во извештајот се документираат измачувања според исказите на лица кои успеале да преживеат, како Халм, хуманитарен активист кој „потпишал лажни признанија“ бидејќи не можел да го поднесе повеќе камшикувањето со кабел по табаните.

Вооружените групи изрекуваат смртни казни „преку моќните исламистички судови со коишто се поврзани и кои правдата ја кројат на основа на нивното толкување на исламското право шеријатот“. Меѓу убиените има и цивили, наведува организацијата и го наведува случајот на 17-годишно момче кое бил обвинето дека е хомосексуалец и жена убиена под обвинение дека е прељубница.

Amnesty ја повикува Меѓународната група за Сирија, а во прв ред Катар, Турција и Саудиска Арабија „да ги прекинат сите испораки на оружје или каква и да е друга поддршка на групите вмешани во воени злосторства и други кршења на правилата на војување, човековите воени права и човековите права воопшто“./крај/мф/сн

Извор: Макфакс