Божјата рака ќе го одмазди погубувањето на саудискиот шиитски клерик шеикот Нимр Бакер ал-Нимр, порача во неделата иранскиот врховен верски водач и врховен авторитет во земјата, ајатолахот Али Хамнеи во врска со егзекуцијата којашто го предизвика гневот на шиитите во регионот и особено во Техеран каде што беше запалена амбасадата на Саудиска Арабија поради што беа приведени 40 лица. 

„Нема сомневање дека неправедно пролиената крв на овој маченик ќе даде плодови, а Божјата рака ќе им се одмазди на саудиските челници“, поради неговото погубувања, изјави ајатолахот Али Хамнеи во неделното обраќање пред верските и други челници, кое е објавено на неговата официјална интернет страница.

„Овој прогонет теолог не ги поттикнуваше луѓето да земат оружје, ниту тајно планирал напади, само отворено критикуваше. Господ нема да го прости пролевањето на крвта на овој невин човек“, истакна иранскиот ајатолах.

Шеикот Нимр ал-Нимр, 56-годишен, беше жесток критичар на сунитската династија Ал Сауд, и го предводеше опозициското движење формирано во 2011 година на истокот од Саудиска Арабија, каде живее најголемата шиитска заедница, која инаку е малцинство во земјата. Шиитите се жалат дека се маргинализирани во земјата којашто е позната по практикување на најконзервативниот облик на сунитскиот ислам. Ријад го осуди во октомври 2014 година за „бунт“, „непослушност кон монархот“ и „поседување оружје“, егзекутирајќи го и покрај повиците на шиитската регионална сила Иран да му го поштеди животот.

По потекло од мнозински шиитската Источна покраина на Саудиска Арабија, ал-Нимр во 1980 година се преселува во Иран каде се посветува на изучувањето на шиитскиот ислам. По враќањето во татковината стекнува голема популарност меѓу шиитите со своите пламени говори во кои сунтиските власти ги обвинуваше за експлоатирање и злоставување на своите шиитски граѓани и бараше поголеми права за ова малцинство кое сочинува околу 15 отсто од саудиското население

Во 2012 година ги поддржа протестите против владата во својата со нафта богата Источна покраина, вдахновен од востанијата ширум Блискиот исток кои започнаа една година претходно познати како Арапска пролет. Апсен е неколку пати, а последниот пат во 2012 година, кога поради тоа избувнаа жестоки протести во неговиот роден град Катиф и кога пророчки изјави дека „неговото апсење или смртта ќе бидат мотив за акција“.

Иран остро го осуди погубувањето на ал-Нимр и порача дека Ријад „скапо ќе плати“ за тоа. Огорчени поради погубувањето на шеикот, демонстрантите ноќта кон неделата ја нападнаа и запалија амбасадата на Саудиска Арабија во Техеран, како и конзулатот во Мошхад. Фрлаа молотови коктели врз зградата на амбасадата и влегоа во заштитениот простор околу зградата, од каде беа потисната од полицијата. Според очевидци, огнот кој беше подоцна изгаснат, сепак, ја уништил внатрешноста на зградата.

По нападот врз саудиската амбасада, во Техеран се уапсени 40 лица, соопшти државниот обвинител на иранската престолнина. „Засега се идентификувани и уапсени 40 лица кои влегле во амбасадата. Истрагата продолжува за да се утврди идентитетот на другите учесници во инцидентот“, изјавил за агенцијата ISNA, државниот обвинител Абаз Џафари Долатабади.

Портпаролот на министерството за надворешни работи, Хосеин Џабер Ансари, побара од полицијата да ги заштити дипломатските мисии на Саудиска Арабија во земјата, осудувајќи го притоа „неправедното погубување“ на ал-Нимр./крај/мф/сн

Извор: Макфакс