Глобалната терористичка мрежа Ал Каеда, чијшто јеменски огранок Ал Каеда на Арапскиот полуостров (AQIP) се смета за едно од најопасните, понуди 20 килограми злато за заробување или ликвидирање на челникот на побунетото шиитско племе Хути и за неговиот сојузник, соборениот во 2012-та претседател Али Абдула Салех, додека Иран, кој отворено ги поддржува Хутите повика на дијалог во Јемен, но истовремено испрати два воени брода во Аденскиот залив.

Наградата во злато за челникот на јеменските Хути, е објавена во видеоснимка објавена од вооруженото крило на Ал Каеда, соопшти американскиот ресурс за следење на активностите на исламистичките интернет страници SITE.

Шиитските муслимани Хути, коишто ги предводи Абдел-Малек ал-Хутини, бунтувајќи се поради слабиот отпор на претседателот Абд Рабо Мансур Хади против сунитските радикали од Ал Каеда, пред шест месеци заземаа голем дел од јеменската престолнина Сана и во март тргнаа во офанзива кон југот на земјата при што ја имаат помошта на единиците кои му се лојални на соборениот претседател Али Абдула Салех.

Хутите ги поддржува шиитски Иран, кој во средата повика на дијалог во Јемен на сите завојувани фракции, за да биде формирана влада во којшто ќе бидат застапени сите страни со што би се спречило Ал Каеда или Исламската држава да завладеат во Јемен.

Сунитска Саудиска Арабија, загрижена од растечката моќ на Хутите и ширењето на иранското влијание, во обид да го запре напредувањето на шиитската милиција „Ансар Алах“, пред две седмици покрена воена воздушна операција во која ѝ се приклучија уште девет сунитски земји од регионот во ткн „арапска коалиција“. Нивната интенција е да биде вратен на власт во земјата претседателот Абд Рабо Мансур Хади, кој откако пред повеќе месеци ја напушти престолнината Сана, минатиот месец беше принуден да побегне и од вториот по големина јеменски град Аден, и во моментов се наоѓа во саудиската престолнина Ријад.

Но Иран, покрај повикот на сејеменски дијалог, во средата во Аденскиот залив испрати и два свои воени бродови со образложување дека нивната задача е да ги штитат иранските комерцијални бродови од пиратите, по што е познат спомнатиот залив. Меѓутоа аналитичарите сметаат дека со тоа всушност дополнително ги зголеми напнатостите во регионот. Хутите се дел од Зајидите, шиитско малцинство во Јемен коешто е подложено на брутални напади од страна на радикалните сунити, како Ал Каеда, коишто ги сметаат за „неверници“.

Меѓународниот комитет на Црвениот крст (ICRC) предупреди на „катастрофалната хуманитарна ситуација во Аден“ во јужниот дел од земјата, кој е цел на несмалено бомбардирање на саудиското воено воздухопловство во обидот да го спречи напредувањето на Хутите. Но и покрај, тоа бунтовниците, откако претходните денови успеаја да заземат важни административни згради во центарот на градот, во средата ја преземаа контролата врз поморското пристаниште, како и на меѓународниот аеродром.

„Состојбата е речиси катастрофална“, изјави портпаролката на ICRC, Мари Клер Фегали. Бродот со 2,5 тони хуманитарна помош успеа во средата да вплови во Аден, соопштија од организацијата Лекари без граници (MSF), кои велат дека станува збор за прва пратка со хуманитарна помош којашто успеале да ја достават по разгорувањето на судирите. Со истиот брод во Аден пристигнала и хируршка екипа којашто веднаш се упатила во главната болница на овој град со околу милиони жители./крај/мф/сн

Извор: Reuters