Огромно мнозинство интернет корисници чии податоци од американските дигитални мрежи ги собирала Агенцијата за национална безбедност (NSA), немале никаква врска со категориите лица кои според законот би можеле да бидат цел на следење на комуникациите, потврдуваат податоците добиени со анализа на документите добиени од поранешниот разузнавач Едвард Сноуден, се наведува во текстот што го објави весникот The Washington Post во своето интернет издание откако неговите новинари спровеле истражување кое траело четири месеци.

„Десет од девет сопственици на интернет акаунти за кои податоците се содржани во големите бази од пресретнати информации, не биле посакувани објекти за следење. Разузнавачите ‘ги земале на пик’ со цел да следат некој друг“, се наведува во материјалот. Според весникот, „многу од таквите лица се Американци“.Како што во повеќе наврати тврдат претставниците на американската администрација, тие никогаш не вршеле надзор врз американски граѓани или лица кои во даден период се наоѓале на територијата на земјата. „На пример, половината од сите откриени фајлови, а тоа е многу висок показател, ги содржеле имињата, електронските адреси и други поединости, коишто NSA и ги означила дека им припаѓаат на граѓани или привремени жители на САД“, се истакнува во текстот. Се посочува и дека „аналитичарите на NSA сокриле или ‘минимизирале’ околу 65 илјади такви референци, но новинарите на The Washington Post откриле уште 900 електронски адреси во некласифицираните датотеки кои на некој начин се поврзани со Американци или со лица коишто живеат во САД“.Авторите на новинарското истражување ветуваат дека нема да ги откриваат деталите „од највредните информации со цел да се избегне попречување на разузнавачките операции кои траат“. Според нив, во тие фајлови се содржат информации за „таен нуклеарен проект во една блиска странска земја, нефер однесување на еден од сојузниците на САД, загинување на војници од една од непријателските (на САД) земји, како и податоци за провалување во американските компјутерски системи“.Истовремено, како што се истакнува во написот, „продолжува повеќемесечното следење на повеќе од 50 акаунти коишто директно доведоа до апсењето во 2011 година во пакистанскиот град Аботабад на Мохамед Тахир Шахзад, кој правел бомби, како и на Умар Патек, осомничен за вмешаност во терористички напади во Индонезија во текот на 2002 година“. Во материјалите имало и други податоци коишто весникот по барање на Централната разузнавачка служба (CIA) не ги објавил, за да не нанесе штета на националната безбедност. „Покрај датотеките коишто аналитичарите ги карактеризирале како бескорисни, сепак продолжило собирањето на информации од интимен карактер. Тоа биле љубовни и стории за скршени срца, сексуални односи, фрустрации, политички и религиозни преписки“, се вели во написот. Весникот истакнува дека станува збор за „секојдневниот живот на повеќе од 10 илјади сопственици на интернет акаунти, кои во никој случај не влегувале во категориите лица за кои е судски е одобрен надзорот./крај/мф/сн

Извор: The Washington Post