Кандидатот на Републиканската партија за американските претседателски избори на 8-ми ноември, Доналд Трамп ја престигнува според популарноста својата против кандидатка од Демократската партија, Хилари Клинтон, откако последните седмици се зацврсти поддршката меѓу веројатните гласачи во неговата партија, покажуваат последните резултати од анкетата на Reuters/Ipsos.

Анкетата спроведена во текот на седмицата од 26-ти август до 1-ви септември, покажува дека 40 отсто од веројатните гласачи би го поддржале Доналд Трамп, а 39 процени би гласале за Хилари Клинтон. Истовремено, 20 отсто од испитаниците се изјасниле против двајцата кандидати.

Во случајот, кога на испитаниците им било предложено да изберат еден од четворицата кандидати за претседателската функција, Трамп и Клинтон биле изедначени според поддршката со 39 отсто. Меѓу републиканските избирачи, дека ќе гласаат за Трамп се изјасниле 78 отсто од испитаниците.

Анкетата била спроведена интернет во сите 50 сојузни држави на САД, и со неа биле опфатени 1.804 испитаници.

Поранешната прва дама и државна секретарка на почетокот од август во анкетата на Reuters/Ipsos имаше предност од рекордни дванаесет а потоа пред неколку седмици од осум процентни поени пред републиканскиот кандидат.

Во коментарот Reuters забележува дека досега Доналд Трамп само двапати водел во анкетите пред Хилари Клинтон, и тоа во мај и во јули.

Збирните резултати од неколку големи анкети покажуваат дека последните седмици предноста на Хилари Клинтон се намалува, но според тие анкети таа сепак уште изнесува меѓу 3 и 7 процентни поени. Некои, пак, анкети покажуваат дека разликата меѓу двата претседателски кандидата е уште помала.

Во петокот беше објавена и телефонската анкетата на весникот USA Today и универзитетот Сафолк, направена во периодот меѓу 24-ти и 29-ти август, и во којашто учествувале илјада полнолетни Американци.

Според оваа анкета, за Хилари Клинтон во овој момент се подготвени да гласаат 42 отсто од испитаниците, а Доналд Трамп имаат намера да го поддржат 35 проценти од гласачите. Кандидатот на Либертаријанската партија, Гери Џонсон има поддршка од 9 отсто, а кандидатката на Зелените, Џил Штајн има 4 отсто поддршка. Притоа 10 отсто од испитаниците биле неопределени,.

„Значителна поддршка на Клинтон ѝ даваат жителите од Источниот и Западниот брег, како и Американките од целата земја“, коментира директорот на Центарот за политички истражувања во Бостон, Дејвид Пелеологос,

Така Клинтон има поддршка во анкетата на USA Today од 54 отсто од жените во САД, наспроти Трамп со 38 отсто поддршка. Поранешната прва дама има предност и меѓу расните малцинства, па кај афроамериканците има популарност од 92 отсто и 65 отсто меѓу хиспаноамериканските избирачи. Трамп, покажува ова истражување, во овие задници има само 4 односно 24 отсто поддршка.

За Клинтон би гласале и 58 отсто од жителите на североисточните делови на САД и 52 отсто од Западниот брег, а истовремено Трамп во овие региони имал поддршка од по 35 отсто од испитаниците.

И покрај фактот што во анкетата објавена во USA Today аутсајдерите не добиле поддршка од 15 отсто од испитаниците, што би им дало шанса за учество во предизборните дебати коишто ќе започнат есенва, Американците сакаат да ги слушнат и нивните идеи за реформи во земјата. Дури 76 отсто од испитаниците го поддржале предлогот за вклучување кандидат од трета партија во дебатата меѓу Трамп и Клинтон, Против таквата идеја се изјасниле 17 отсто од испитаниците а 7 проценти биле неопределени.

Телевизиските дуели меѓу кандидатите на Републиканската и на Демократската партија се закажани за 26-ти септември, и 9-ти и 19-ти октомври.

И Трамп и Клинтон и натаму имаат високо ниво на непопуларност, 59 отсто за републиканецот и 51 процент за демократката. Речиси секој петти испитаник одговорил дека не му се допаѓаат и двата кандидата. Притоа на Трамп не му веруваат 61 отсто, а на Клинтон 59 отсто од испитаниците во анкетата на USA Today./крај/мф/сн

Извор: Макфакс