Републиканскиот кандидат на американските претседателски избори на 8-ми ноември ја надминал според популарноста демократската ривалка Хилари Клинтон на Флорида и во Пенсилванија, покажува истражувањето на јавното мнение спроведено од Quinnipiac, додека исто така во средата објавеното истражување на агенцијата Marist покажува дека на 3 процентни поени ја намалил нејзината предност меѓу американските избирачи. 

Анкетата на Quinnipiac ги опфаќа одговорите на испитаниците откако Федералното биро за истраги (FBI) ги објави своите заклучоци во врска со истрагата за користењето на приватната електронската пошта на Хилари Клинтон наместо службената за доверливи дипломатски преписки во периодот додека беше државна секретарка. Притоа е очигледно дека иако заклучоците на FBI и на државната обвинителка дека нема причини за подигнување обвинение против Клинтон, таа загубила проценти од довербата кај гласачите која станува збор за чесноста и етичноста.

Анкетата укажува на неизвесни трки во сојузните држави Флорида, Пенсилванија и Охајо, држави каде што гласачите уште не се одлучиле и на кои на ноемвриските избори би можеле да победат или републиканците или демократите.

Анкетата на Quinnipiac, спроведена од 30-ти јуни до 11-ти јули на речиси 3.000 испитаници, покажала дека Доналд Трамп е сериозен противкандидат на Хилари Клинтон во споменатите три сојузни држави една седмица пред почетокот на републиканската конвенција во Кливленд, на којашто формално треба да биде номиниран за претседателски кандидат на изборите на 8-ми ноември.

Испитувањето е спроведено телефонски на 1.015 луѓе на Флорида, 955 во Охајо и 982 во Пенсилванија и има маргина на грешка од три процентни поени во сите три држави.

Питер А. Браун, помошник директор за истражување, вели дека не постои сигурна врска меѓу падот на популарноста на Клинтон на Флорида и заклучокот на FBI дека невнимателно постапувала со владината електронска пошта и доверливите информации, додека била државна секретарка. Но додава дека ја загубила предноста во очите на јавноста во однос на Трамп кога станува збор за моралот и чесноста.

Клинтон загубила 8 процентни поени на Флорида, каде Трамп добил поддршка од 42 отсто од испитаниците а таа 39 отсто. Во Охајо и двата кандидата имаат по 41 отсто поддршка, додека во Пенсилванија води Трамп со 43 пред Клинтон со 41 отсто поддршка.

Истражувањето на социолошката агенција Marist за телевизија NBC News и за весникот The Wall Street Journal, објавена претходно седмицава, покажа дека во Пенсилванија има сосема поинакви резултати – Клинтон има поддршка од 45 отсто, а Трамп 36 отсто. Оваа анкета е спроведена од 5-ти до 10-ти јули на 829 испитаници со маргина на грешка од 3 процента.

Претходно во вторникот испитувањето на Ipsos за Reuters, покажа дека на национално ниво Клинтон води пред Трамп со 13 процентни бодови. Оваа анкета спроведена преку интернет од 8-ми до 12-ти јули на 11.46 избирачи со маргина н можна грешка од три отсто, покажува дека Клинтон има поддршка од 46 отсто а Трамп од 33 отсто.

Меѓутоа, анкетата на Marist спроведена заедно со издавачкиот холдинг „The McClatchy Company“ објавена во средата, покажува, пак, дека Трамп успеал за 3 процентни поени да го намали заостанувањето зад Клинтон меѓу американските гласачи.

Според оваа анкета, спроведена од 5-ти до 10-ти јули над 1.249 полнолетни Американци од целата територија на САД, дека во ноември се подготвени да гласаат за Трамп рекле 39 отсто, додека за Клинтон 42 отсто од испитаниците. Истовремено експертите кои го спровеле ова истражување нагласуваат дека тие првпат регистрирале пад на популарноста на поранешната прва дама на САД под 50 отсто од гласачите.

Истовремено 64 од испитаните Американци рекле дека не се наклонети на милијардерот, а негативен однос кон поранешната државна секретарка имаат 60 отсто од испитаниците. Клинтон ја поддржуваат 57 отсто од поддржувачите на нејзиниот довчерашен противкандидат за демократската номинација Берни Сандерс, кој во вторникот се откажа до трката во нејзина полза. Трамп, пак, го поддржуваат 60 отсто од поддржувачите на неговите поранешни ривали во републиканскиот табор.

Популарноста на Клинтон е највисока меѓу црнечкото население и изнесува 81 отсто, каде Трамп има поддршка од само 6 отсто. Клинтон е попопуларна, исто така, и меѓу жените и хиспаноамериканците, а Трамп, пак, повеќе се расположени да го поддржат мажите и белците. Според анкетата, 48 отсто од испитаниците ја поддржуваат поранешната прва дама затоа што не им се допаѓа кандидатурата на бизнисменот, а 56 отсто ќе гласаат за Трамп затоа што Клинтон кај нив не предизвикува никакви симпатии./крај/мф/сн

Извор: Макфакс