Саудиска Арабија во саботата погуби 47 луѓе осудени за „тероризам и поттикнување на него“, меѓу кои се и шиитскиот проповедник Нимр Бакер ал-Нимр. Кој беше истакнат претставник на опозицијата на саудискиот режим, како и еден од челниците на ќелијата на Ал Каеда Фарис аз-Захрани, кои на смртна казна беа осудени во 2014 година, а осуди за егзекуциите пристигнуваат од сите страни.

Осудениците се погубени во дванаесет различни градови во саудиската монархија, се додава во соопштението на министерството за внатрешни работи. Меѓу лицата кои се погубени во саботата има сунити осудени за учество во крвавите напади од 2003 и 2004 година, за коишто одговорноста ја презема Ал Каеда, како и еден Египќанец и државјанин на Чад, пренесе саудиската државна агенција SPA.Шеикот Нимр ал-Нимр, 56-годишен, беше жесток критичар на сунитската династија Ал Сауд, и го предводеше опозициското движење формирано во 2011 година на истокот од Саудиска Арабија, каде живее најголемата шиитска заедница, која инаку е малцинство во земјата. Шиитите се жалат дека се маргинализирани во земјата којашто е позната о практикување на најконзервативниот облик на сунитскиот ислам.Шеикот ал-Нимр судот за случаи на тероризам во саудиската престолнина Ријад во октомври 2014 година го осуди за „бунт“, „непослушнсот кон монархот“ и „поседување оружје“. Иран, доминантно шиитска регионална сила која им напнати односи со Саудиска Арабија, повеќепати апелираше до Ријад да го поштеди животот на шиитскиот челник. Во саботата на критиките на Техеран, се придружија и Либан, Сирија и Ирак, каде што живеат големи шиитски заедници.Братот на ал-Нимр изјави дека семејството е шокирано, но се надева дека реакциите на веста за погубувањето на неговиот брат ќе бидат мирни.„Шеикот Нимр уживаше голем углед во заедницата и воопшто во муслиманското општество и нема сомневања дека ќе има реакции. Се надеваме дека  тие ќе бидат мирни. Реакција надвор од тие рамки не би требало да има. Доста е крвопролевања“,  изјави Мохамад ал-Нимр.Либанскиот врховен исламски шиитски совет го осуди погубувањето порачувајќи дека станува збор за „тешка грешка“. „Погубувањето на шеикот ал-Нимр е погубување на разумот, умереноста и дијалогот“, се вели во соопштението на потпретседателот на советот, шеикот Абдел Амир Калабан. Влијателниот ирански верски челник, близок на владејачките кругови, го осуди погубувањето и оцени дека ќе има последици за саудиското кралско семејство. „Не се сомневам дека таа чиста крв ќе ја извалка куќата Ал Сауд и ќе ги избрише од страниците на историјата. Злосторство со погубувањето на шеикот ал-Нимр е дел од злосторничкиот образец на ова предавничко семејство…., се очекува дека исламскиот свет ќе го осуди овој злогласен режим најсилно што е можно“, изјави ајатолахот Ахмед Хатеми, член на Советот на експертите, а ги води традиционалните петочни молитви.Погубувањето на шеикот го осуди и пратеникот во ирачкиот парламент Мохамед ал-Сајхуд, порачувајќи дека целта на овој чин е да се разгоре судир меѓу сунитите и шиитите и „да го запали регионот“.Саудиска Арабија во изминатата 2015 година егзекутирала 157 луѓе, а повеќето од нив се извршуваат со обезглавување со сабја. Така ланската стана рекордна година во извршување на смртна казна во монархијата по 1995 година, кога биле погубени 192 лица, според Amnesty International.Последните години се погубувани во просек од 79 до 90 луѓе осудени за „дела кои не се поврзани со смртни случаи, како оние поврзани со дроги“, се наведува во извештајот на споменатата меѓународната група за човекови права. Според ноемврискиот извештај на Amnesty International, околу 40 отсто од вкупниот број егзекуции во 2015 година, односно најмалку 63, вклучително врз 45 странски државјани, биле за кривични дела поврзани со трговија со наркотици. „Странските државјани, повеќето работници мигранти од земјите во развој, се особено ранливи бидејќи тие обично не го или малку го знаат арапскиот јазик и не им се дозволува соодветен превод на судењата“, се вели во извештајот и се додава дека „судењата се одржуваат во тајност и обвинетите ретко имаат пристап до одбрана“. Според организацијата чие седиште е во Лондон, често „признанијата“ се изнудуваат со тортури или измами.Претходен извештај, од август минатата година, говореше дека повеќе од 2.000 луѓе се погубени во Саудиска Арабија во периодот меѓу 1985 и 2013 година, од кои половината биле странци. Се додава, исто така, дека саудиските власти не ги поштедуваат и лицата со ментални пречки во развојот од егзекуции.Повеќето од егзекуциите се вршат на јавни простори, а во некои случаи обезглавените тела се оставаат да висат на плоштадите како „порака“, забележуваат критичарите.Ријад е под силен притисок поради најголемата стапка на извршување смртни казни во светот. Според саудискиот закон, отпадништвото од верата, вооружен грабеж, шверц со дроги, силување и убиство се дела за кои се изрекува смртна казна./крај/мф/сн

Извор: Макфакс