Коалицијата на сунитските арапски земји од Персискиот залив предводени од Саудиска Арабија во средата ги продолжи воздушните напади врз позициите на борците побунетото шиитско племе Хути и врз нивните сојузници приврзаници на соборениот во 2012 година јеменски претседател Али Абдула Салех во јужниот дел од Јемен, а според очевидци биле извршени најмалку 12 воздушни удари.

Во пет воздушни напади врз провинциите Лахџ и Далеа убиени биле десетина борци на шиитската милиција Ансаралах, потврдиле локални жители за Reuters кој забележува дека нападите во средата доаѓаат не цел ден откако арапската коалиција најави дека ги прекинува бомбардирањата од операцијата „Решителна бура“ и од полноќ кон средата ја започнува операцијата „Враќање на надеждта“, која требаше да се води во копнено запирање на напредувањето на јеменските бунтовници, осигурување на цивилното снабдување и доставување хуманитарна помош.

Борбите меѓу бунтовниците од племето Хути и војниците лојални на Салех против јеменскиот претседател Абд Рабу Мансур Хади, кого го обвинуваат дека не се спротиставуваше на напредувањето на радикалната група Ал Каеда на Арапскиот полуостров (AQIP), и кого го поддржува Саудиска Арабија, се разгореа во двете споменати провинции по почетокот на воздушните удари од 26-ти март. Бомбардирањата на воените воздухопловства на арапските земји во средата се регистрирани и во централниот град Таиз.

Хутите ја контролираат престолнината Сана, а коалицијата настојува да ги спречи да воспостават целосна контрола врз вториот по големина град и важно пристаниште Аден, на југот од Јемен. Во средата, коалицијата ја повлече најавата за крај на воздушните удари и соопшти дека и натаму ќе дејствува врз бунтовниците, доколку е потребно.

Претходно во средата Велата куќа објави оти САД сметаат дека работата во Јемен сé уште не е завршена. „Очигледно работата не е завршена“, изјави за CNN директорката за комуникации на Белата куќа, Џен Псаки.

Призна и дека проблемите во Јемен и натаму се присутни. „Нестабилноста и натаму трае во регионот, во Јемен и уште многу работи треба да се завршат“, рече Псаки и најави дека САД ќе продолжат да работа на тоа со „партнерите од целиот свет“.

Вашингтон, инаку, имаше ограничена улога на поддршка на арапската кампања во Јемен. „Сите страни во Јемен треба да постигнат дипломатско решение, бидејќи нема друго решение коешто би можело да дејствува“, рече Псаки и порача дека „тоа не е војна којашто може да се добие на бојното поле“.

Црвениот крст објави дека речиси едномесечното бомбардирање предизвикало „шокирачки штети за цивилното население“. Според Светската здравствена организација (СЗО – WHO) само до 117-ти април биле убиени 944 лица, а 3.487 цивили се ранети при што не се пресметани и најмалку 40-те жртви и 574 ранети од понеделникот во Сана, и исто така 40 во вторникот во напад врз станбена зграда во северозападниот град Харад и врз мост во централната покраина Ибб.

Помошта му е неопходна на Јемен, најсиромашната арапска земја која е разорена до судирите а Црвениот крст побара помош во храна за 20.000 илјади семејства во следните три месеца. „Колатералната штета сторена врз цивилното население, неговиот живот и сопственост со воздушните удари, како и со копнените борби, е апсолутно шокантно, во прв ред во градовите Сана, Аден, Таиз и Мариб“, изјави за AFP регионалниот директор Роберт Мардини во Женева по враќањето од Јемен./крај/мф/сн

Саудиска Арабија, пак, оцени дека „арапскиот свет му покажал на Иран дека може самиот да ги штити своите интереси“, додека Техеран бара итен прекин на нападите и негира дека ги помага Хутите кои го обвинуваат Ријад дека сака да создаде простор во Јемен за дејствување на Ал Каеда.

„Воената интервенција во Јемен покажа дека (сунитската) монархија може да му се спротистави на (шиитски) Иран кој ги вежба, вооружува и финансира Хутите и го шири своето влијание во арапскиот свет сé до јужната граница на Саудиска Арабија, и дека арапските земји се способни да ги заштитат своите интереси и без водството на САД“, рече во интервјуто за Reuters саудискиот амбасадор во Велика Британија.

Амбасадорот, принцот Мохамед бин Наваф рече и дека „Иран не смее да се меша во јеменските прашања. Тој не е дел од арапскиот свет“. Го обвини Техеран дека со своето мешање ка „запалил нестабилноста“ во регионот.

„Сакаме арапскиот свет да биде слободен од секакви мешања“, вели бин Наваф и нагласи дека „ние можеме „сами да ги решаваме своите проблеми“.

„Доктрината на (американскиот претседател Барак) Обама е многу јасна. Тоа е историско пријателство кое ќе продолжи, но мораме себе самите да си потврдиме. Не само Саудиска Арабија, туку арапските земји. Тоа мора да биде заедничко“, вели саудискиот амбасадор во Лондон. /крај/мф/сн

Извор: Макфакс