Аргентинците во недела излегуваат на претседателските избори за да го изберат претседателот кој по 12 години ќе стави крај на владеењето на брачната династија Киршнер, покојниот Нестор, од 2003 до 2007 година, и неговата вдовица и наследничка на должност Кристине Фернеандез де Киршнер, од 2007 до 2015 година.

Кристине Фернеандез де Киршнер поради уставните ограничување не може да се кандидира за третиот последователен мандат и по првичното двоумење го поддржа Даниел Скиоли, потпретседател на државата во времето во нејзиниот сопруг Нестор Кишнер и актуелен гувернер на покраината на главниот град Буенос Аирес.

„Преобразувањето на Аргентина нема да заврши, бидејќи Даниел ќе биде претседател на сите Аргентинци и ќе ги продолжи програмите кои ги започнавме“, изјави Фернандез де Киршнер на собирот на Скиоли.

Скиоли е кандидат на владејачката перонистичка коалиција Фронт за победа, но се смета дека е повеќе свртен кон центарот од левичарската брачна двојка Киршнер, и дека е поумерен од нив. Критичарите често ги обвинуваа Киршнер дека владеат авторитарно и не се грижат многу за постигнување консензус.

Даниел Скиоли, кој во младоста многу успешно се занимавал со трки на брзи бродови и ја загубил раката во несреќа на трка на реката Парана во 1989 година, е голем фаворит на неделните избори.

Според аргентинскиот изборен закон, за победа во првиот круг од претседателските избори треба да освои 45 отсто од гласовите или 40 отсто под услов второпласираниот заостанува повеќе од 10 отсто. Според последните анкети, Скиоли е близу освојување 40 отсто, а неговиот главен противкандидат, градоначалникот на Буенос Аирес, Маурисио Макри, кандидат на опозициската коалиција на десниот центар Камбиемос, е на работ од освојување на 30 отсто, што значи дека ќе биде неизвесна трката дали ќе има втор изборен круг.

Третиот силен кандидат Серхио Маса, кој беше шеф на администрацијата на Нестор Киршнер, но од брачната двојка се одвои со засебна политичка платформа, полека ја губи поддршката, бидејќи предизборната кампања стана многу поларизирана. Во анкетите не добива повеќе од 20 отсто.

Следниот аргентински претседател, која презема должноста на 10-ти декември, ќе мора да се фати во костец со решавањето на проблемот со инфлацијата, која на годишно ниво изнесува околу 20 отсто и го поттикнува развојот на црниот финансиски пазар и намалувањето на девизните резерви на централната банка.

Вториот проблем ќе му биде прашањето на пропаднатите акционери по државниот банкрот на Аргентина во 2001 година. Малку повеќе од 92 отсто од акционерите успеаја да се договорат со владата околу делумна отштета, но преостанатите 8 проценти бараат целосна отштета и ја тужеа Аргентина пред американските судови. Поради тоа Аргентина нема пристап до поголем дел од меѓународниот кредитен пазар.

Аргентинската економија релативно добро се справува со светската финансиска криза и бележи маргинален раст, додека за споредба соседен Бразил е во рецесија, што Скиоли го припишува на „континуираната домашна потрошувача и рамномерната распределба на доходите“.

Фернандез де Киршнер и на крајот од својот втор мандат и натаму е популарна, и сите тројца главни кандидата признаваат дека Аргентина многу напредувала од периодот на масивната криза на почетокот од веков, и дека ќе се трудат да ја надградат нејзината политика./крај/мф/сн

Извор: Макфакс