Сирискиот претседател Башар ал-Асад изјави во четвртокот дека е потребна „вистинска и искрена меѓународна соработка“ за да се победат терористичките организации како што е Исламската држава (IS) којашто повеќе од два месеца се обидува да ја совлада меѓународната коалиција предводена од САД.
 

Сирискиот претседател Башар ал-Асад изјави во четвртокот дека е потребна „вистинска и искрена меѓународна соработка“ за да се победат терористичките организации како што е Исламската држава (IS) којашто повеќе од два месеца се обидува да ја совлада меѓународната коалиција предводена од САД.

„Регионот минува низ решавачки период“, изјави сирискиот претседател Башар ал-Асад на средбата со претставниците на партијата Баас којашто доминира во Сирија повеќе од четири децении, од периодот на неговиот татко.

„Поддршката на земјите кои се пријатели на сирискиот народ и светската стабилноста, и вистинската и искрена меѓународна соработка пред тоа опасно зло, ќе бидат решавачки“, додаде сирискиот претседател, пренесува официјалната новинска агенција Sana.

Владата на сирискиот претседател Асад, кој доаѓа од алавитската (шиитската) заедница, а ја има поддршката на либералните сунити, христијаните и друзите, додека значајната курдска заедница е воздржана во граѓанскиот конфликт кој се претвори во меѓусекташки, за пријателски земји ги смета во прв ред Иран, Русија и Кина. Власта, исто така, терористи ги нарекува и сунитската вооружена опозиција која ја има поддршката на сунитските арапски земји од регионот, од сунитска Турција и од Западот, којашто со нивна поддршка во март 2011 година го започна бунтот на бранот на ткн Арапска пролет со која во редица арапски земји беа соборени децениските авторитарни претседатели.

Асад од почетокот на бунтот предупредуваше дека во редовите на бунтовниците коишто ги поддржуваат западните земји има екстремни исламистички групи и дека може да се повтори ситуацијата од другите земји каде што и по три години се водат судири со исламистите. Претходно западните медиуми ги премолчуваа самоубиствените бомбашки напади и бруталните егзекуции изведени од сунитските екстремисти против цивили и владини претставници во Сирија, но од 2012 година на сириското боиште се декларираше силната исламистичка групација Џебхет (Фронтот) ан-Нусра, блиска на глобалната терористичка мрежа Ал Каеда, а од 2013 година како најмоќна се издвои Исламската држава во Ирак и на Левантот (ISIL) којашто подоцна го смени името во Исламска држава (IS) и во јуни 2014 година на освоените територии во источна Сирија и северозападен Ирак прогласи калифат.

„Терористичките групи со Исламската држава на чело, се резултат на погрешните и агресивни политики на оние коишто тргнаа во војна против Сирија“, истакна Асад, алудирајќи на земјите коишто ја финансираат и вооружуваат а според него и ја формирале сунитската опозиција во егзил, во прв ред Саудиска Арабија, Катар и Турција, зад кои стојат САД, Франција и Велика Британија.

Вашингтон порано инсистираше Асад да отстапи од власта, меѓутоа во моментов му е потребен сојузник и приоритет му е борбата против Исламската држава. САД кои од август преземаа воени удари врз позициите на џихадистите во Ирак, од октомври започнаа со воздушни напади и во Сирија и покрај предупредувањето на Русија дека треба да бидат во координација со официјален Дамаск, бидејќи на овој начин претставуваат кршење на сирискиот суверенитет.

Овие изјави на Асад доаѓаат во периодот на подготовка на висока сириска делегација која следната среда треба да допатува во Москва, каде што ќе се сретне со рускиот претседател Владимир Путин за покренување на мировните преговори меѓу власта и опозицијата./крај/мф/сн

Извор: Макфакс