Сирискиот претседател Башар ал-Асад изјави во едно од ретките интервјуа за европските медиуми емитувано во вторникот вечерта на Чешката телевизија, дека мирот во неговата земја ќе се врати кога Западот, како и Турција, Саудиска Арабија и Катар, ќе престанат да ги поддржуваат терористите, на турскиот претседател Реџеп Тајип Ердоган му предвидува брз политички крај, и истакна дека од должноста ќе си замине доколку Сиријците не гласаат за него, со што ги отфрли притисоците транзицискиот период во земјата да се води без него.

„За враќање на мирот неколку земји, Франција, Велика Британија, САД, Саудиска Арабија и Катар, и уште неколку други, треба да престанат да ги поддржуваат терористите. Веќе следниот ден ќе биде подобро и за неколку месеци ќе имаме целосен мир во Сирија“, тврди Асад.Финансиите и оружјето за терористите, продолжи Асад, одат главно преку Турција, со поддршка на Саудиска Арабија и Катар. „Доколку навистина сакаат да се борат против нив (терористите) и да ги победат, мора да се спречи снабдувањето со оружје, финансии и борци, што оди главно преку Турција, со поддршка на Саудиска Арабија и Катар. Тоа е првиот чекор кој мора да се преземе, почнувајќи ја борбата со тероризмот. Инаку сите со него ќе војуваме, а притоа тие имаат неограничено снабдување (со оружје) од различни земји, особено од нашиот регион, со поддршка или со затворање на очите од страна на Западот. Поточно, на некои западни земји“, рече.Во своето интервју за чешката државана телевизија, сирискиот челник вели дека се сомнева во покренувањето на голема коалиција против тероризмот.„Зошто ништо не научија по Charlie-Hebdo? Не може да се борите против тероризмот додека директно ги поддржувате терористите со оружје и во сојуз со најголемиот поддржувач на тероризмот, односно саудиската монархија“, порача Башар ал-Асад.Оцени дека Франција не прави ништо сериозно со ударите врз Исламската држава, додека Русија е многу сериозна во борбата против тероризмот и во соработката со сириската армија. Според него, дури откако во воздушните напади се вклучи Русија,(30-ти септември), Исламската држава и Џебхат ан-Нусра, сириското крило на Ак Каеда, се принудени да отстапуваат од териториите што ги заземаа во Сирија.„Несомнено, токму учеството на Русите, формирањето на фронт во борбата со тероризмот стана најважниот фактор во пресвртот на ситуацијата во Сирија“, изјави Асад за Чешката телевизија одговарајќи на прашањето што најмногу влијаело врз сегашната промена во ситуацијата во борбата против тероризмот во неговата земја.Во врска со турското уривање на рускиот борбен авион, Асад оцени дека турскиот претседател Ердоган ја „загуби ладнокрвноста, бидејќи руската интервенција ги промени односите на силите на теренот“. „Поразот на Ердоган во Сирија, поразот на неговата терористичка група, го одбележува неговиот политички крај“, заклучи Асад.На прашањето за можноста за влегување на терористите во Европа меѓу сириските бегалци, Асад одговори дека секако имало уфрлувања, но дека е тешко да се утврди во колкав обем. „Верувам дека на фотографиите и видео снимките на интернет може да се пронајдат докази дека некои кои овде убиваа, а понекогаш и отсекуваа глави на луѓе, заминале во Европа како мирни граѓани“, додаде.Европа, оцени сирискиот претседател, не успеала да ги интегрира имигрантите од различните култури, а „вахабитските институции“ ги финансирале активностите со коишто се „искривува толкувањето на исламот“. „Тој регион на Блискиот исток извезе одреден екстремизам во Европа, во нашата криза Европа ни го извезува екстремизмот нам“, рече Асад.Во врска со сириската опозиција, Асад го изрази ставот дека таа мора да биде создадена во Сирија, а не во странство. Според него, не може сериозно да се зборува за сириска опозиција, бидејќи таа опозиција држи во рацете оружје. Доколку таа опозиција е политичка, таа треба да има поддршка во сириското општество, а не да ја наметнува со оружје, смета Асад.„А кога зборуваме за бунтовниците, кои имаат оружје за да го напаѓаат сирискиот народ и неговата армија, да го уништуваат јавниот или приватниот имот, па тоа е тероризам“, додаде Асад во интервјуто за чешкиот телевизиски сервис.„Другиот природен аспект на опозицијата треба да биде патриотизмот, кој го нема кај опозицијата којашто е формирана во Франција, Саудиска Арабија, Катар, САД или Велика Британија. Автентичната сириска опозиција треба да биде создадена во Сирија, и таква постои. Друго е прашањето, дали таа е широка и колку е силна“, додаде сирискиот претседател.Во врска со сликата којашто Западот ја има за него, вели дека таа срамежливо се поправа. „Во 2005-та бев убиец, па во 2008 година и подоцна бев миротворец и во 2011-та сум мршојад. Сега се случува позитивна промена“, рече Асад.На крајот од интервјуто рече дека основните цели на Сирија се победата над тероризмот, зачувување на секуларното општество и спроведување на политичките реформи во интерес на Сиријците, и повтори дека нема намера да поднесе оставка среде војна, но дека еден дена на избори Сиријците ќе одлучат дали го сакаат и натаму или не за претседател, како и оти е подготвен да замине од должноста доколку не биде изгласан.Асад истакна дека никогаш не се стремел по секоја цена да биде и да се одржи на челната позиција во земјата. Главна е, рече, волјата на сирискиот народ.„Се разбира, сега, во екот на војната, не можам да кажам од каква и да е причина дека ја напуштам функцијата, инаку би станал предавник. Но кога на крајот ќе дојдат изборите, сирискиот народ самиот нека одлучува. Доколку сака да ме види на чело на државата, со задоволство ќе останам на должноста. Доколку не сака, со задоволство ќе заминам…. Со тоа јас немам никакви проблеми“, порача Асад во интервјуто за Чешката телевизија./крај/мф/сн

Извор: Макфакс