Сирискиот претседател, Башар ал Асад, положил заклетва за нов седумгодишен мандат во земјата која целосно е разорена од граѓанска војна.

Асад ја положил заклетвата во својата палата сместена веднаш над престолнината, додека во земјата повеќе од три години се води војна во која од почетокот до сега убиени се повеќе од 170 илјади лица, а милиони луѓе беа принудени да ги напуштат своите домови.

Четириесетиосум годишниот автократ победи на претседателските избори на трети јуни кои критичарите ги опишаа како „фарса“, а неговите воени трупи продолжија да напаѓаат области кои се под контрола на бунтовниците, фокусирајќи се моментално на Алепо на северот од земјата, пренесуваат странските медиуми.

По неговата инаугурација владата во земјата мора да поднесе оставка, по што Асад треба да именува нов премиер.

По првите две години владеење од неговата победа, поддржувачите на опозицијата од Запад и поддржувачите од арапскиот свет инсистираа дека тој мора да ја напушти власта, но растењето на исламистичката Исламска држава предизвика промена на текот на ситуацијата и разбуди стравувања во поглед на иднината, особено во Европа.

„Ситуацијата на Блискиот исток се менува многу брзо. Нестабилноста го растргна вниманието на меѓународната заедница“, вели Самит Нашар, искусен сириски дисидент и член на опозициската Национална коалиција, во изјава за странските медиуми.

Според него, светот не може да се одлучи на што побрзо да реагира. Дали да се фокусира на Исламската држава, на Ирак или фокусот да го насочи кон Египет.

„Асад положи заклетва во момент кога целиот регион гори, додека Израел изведува воздушни напади против Хамас во Газа, додека ирачката централна влада е значително ослабена поради џихадистичката офанзива, а Либија се повеќе тоне во безаконие и хаос“, додава Нашар.

Тој објаснува дека Асад успеал својот режим да го прикаже како прифатлива опција „во споредба со исламската држава и екстремизмот, особено во очите на европските земји.

Според аналитичарите успехот на џихадистите е еден вид „подарок“ за Асад, кој од почетокот на бунтот во март 2011 година ја критикувал акцијата на бунтовниците како „терористичка завера“ со странска поддршка.

Според нив сирискиот лидер ќе се обиде да го искористи стравот на Западот од исламистичкиот екстремизам и себе си ќе се претстави како заштита од ваквите појави.

Следејќи ги чекорите на својот татко и претходник, Хафез, кој со помош на „цврста рака“ владеел со Сирија 30 години, Асад ги игнорира западните повици за негово повлекување од претседателската функција, иако голем број земји и организации ја признале опозицијата како легитимен претставник на сирискиот народ, вели Нашар.

Според него, Асад ужива постојана финансиска, воена и дипломатска поддршка од неговите сојузници Иран и Русија, а целта на сирискиот претседател е да продолжи со својата воена стратегија, пренесуваат странските медиуми.

„Асадовата стратегија најверојатно е да ги задржи областите кои веќе се под контрола на режимот како и да ја врати контролата и територијата над цел Алепо“, смета Лина Хатиб, директор на Карнегиевиот центар за Блискиот исток.

Според нејзините зборови, тоа ќе доведе до тоа голем број области во Сирија да бидат или под контрола на режимот или под контрола на Исламската држава, додека зоните на југот од земјата главно ќе бидат во рацете на бунтовниците припадници на Слободната сириска војска.

„Со вака поставени работи тој може да опстане само на краток рок“, заклучува Хатиб./крај/мф/ап