Сирискиот претседател Башар ал-Асад би ги предупредил САД дека џихадистите од Исламската држава (IS) подготвуваат напади во Америка, доколку поседувал такви информации, потврди во интервјуто за американската телевизиска мрежа MSNBC во сетот прашања во врска со односите и улогата на Вашингтон во повеќе од петгодишната војна во Сирија, во кои меѓу другото ги обвинува САД дека со помош на тероризмот сакаат да ја соборат легалната сириска влада.

„Седиштето на Исламската држава е во Рака, во вашата земја. Дали доколку знаевте дека Исламската држава има намера да ги нападне САД, би ја предупредиле Америка“, го запраша новинарот сирискиот претседател,

„Во принцип, да. Тие можат да напаѓаат цивили“, одговори Асад истовремено додавајќи дека тоа е помалку нереално, бидејќи „меѓу САД и Сирија нема соработка“. „Таквите информации, заедничкото дејствување… претпоставува соработка во сферата на безбедноста, што се базира на политичка соработка, а меѓу нас не постои ниту едното, ниту другото“, додаде Башар ал-Асад.

Според него, американски воздушни удари во Сирија, кои Вашингтон ги започна во есента 2014 година предводејќи ја меѓународната коалиција сочинета од 66 земји, се „контрапродуктивни и неефикасни“.

„Прашањето не е во тоа колку воздушни удари ќе бидат изведени, туку во тоа какви ќе бидат постигнувањата од нив. Реалност е дека од почетокот на американските воздушни удари тероризмот се рашири, а се намали само откако се вмеша Русија“, рече Асад, оценувајќи дека американското дејствување во Сирија е нелегално според меѓународното право, бидејќи се извршуваат на сириска територија без консултации, па дури и без известување на официјален Дамаск.

Меѓутоа, веќе во следниот договор Асад тврди дека Вашингтон се обидува да управува со активностите на терористи, за да ја отстрани легалната власт во Сирија.

Официјален Дамаск ги нарекува „терористи“ и сите групи и на разединетата сунитска вооружена опозиција помагана од САД и нејзините регионални и западни сојузници кои ја нарекуваат „умерена“ опозиција.

„Ние сакаме да го поразиме тероризмот, додека истовремено САД сакаат да управуваат со нивните активности за да ја соборат владата на Сирија… Тие (САД) се присутни во Ирак од 2006 година и не се обидоа да ги победата (терористите)“, го пренесува одговорот на Асад сириската државна агенција SANA содржан во интервјуто од кое сегменти беа емитувани на американската телевизија NBC.

Асад истакнува дека терористичката група Исламска држава била формирана во 2006 година во Ирак, во периодот кога во Ирак беа присутни американските сили.

Сирискиот претседател не очекува промена во политиките на САД во однос на Сирија, и откако во јануари ќе измине мандатот на актуелниот американски претседател Барак Обама, бидејќи според него станува збор за смена на американската администрација, а не на политиките на Вашингтон.

„Тоа не значи ништо за нас (Сирија), бидејќи се менува администрацијата а не политиката. Во Сирија ние никогаш не ги определувавме чекорите ниту во однос на претседателите кои заминуваат, ниту на оние кои доаѓаат, бидејќи она што тие го зборуваат во своите кампањи се разликува од она што го прават откако ќе бидат избрани“, одговори Асад на прашањето на новинарот дали го поздравува заминувањето на Обама од претседателската функција.

„Секогаш се надеваме дека следниот претседател ќе биде многу помудар од претходниот, помалку воинствено настроен… Тоа е она на што се надевавме, но никогаш не го видовме…. Продолжуваме да се надеваме, но не полагаме многу на таа надеж“, додаде сирискиот претседател.

Асад во тој контекст вели дека „проблемите на САД“ се состојат во тоа што последните американски претседатели немале доволно искуство во надворешната политика, одговарајќи на прашањето дали стравува од тоа што републиканскиот кандидат на ноемвриските претседателски избори Доналд Трамп има многу малку искуство во надворешната политика.

„А кој имаше (искуство) претходно. (Барак) Обама? Или Џорџ В Буш? Или (Бил) Клинтон? Тоа е проблемот на САД“, рече Асад.

Според него, „неколку години“ работа во Конгресот или на дипломатски должности се недоволни за добивање такво искуство. „Да се има таков човек (без искуство –з.р.) во Белата куќа, е опасно за целиот свет“, заклучува сирискиот претседател во интервјуто кое целосно треба да биде емитувано на MSNBC подоцна во четвртокот./крај/мф/сн

Извор: Макфакс