Сирискиот претседател Башар ал-Асад изјави во неделата дека владините сили биле принудени да отстапат од некои региони во земјата за да се концентрираат на оние коишто се важни за борбата против сунитската опозиција и сунитските џихадисти потврдувајќи дека армијата се соочува со недостиг од кадар поради слабите одѕиви на повиците за мобилизација и дезертерствата, но сепак вели дека нема компромисно и политичко решение и отфрли поделба на териториите.

Во процента на состојбата во земјата, којашто западните медиуми ја оценуваат како „невообичаено отворена“, шиитскиот сириски претседател Башар ал-Асад по конфликтот што избувна во март 2011 година како дел од ткн Арапска пролет, за што тој ги обвини сунитските арапски монархии од регионот и сунитска Турција, рече дека видот на војување со кој се соочува Сирија бара војската да не дејствува насекаде, туку да биде концентрирана на виталните области.

„Понекогаш, во одредени околности, принудени сме да се повлечеме од некои области и војниците да ги префрлиме на други кои сакаме да ги задржиме. Мораме да ги дефинираме важните региони кои војската мора да ги контролира за да не се дозволи паѓањето на некои други“, рече Асад, во телевизиското обраќање.

Западните аналитичари велат дека војската на официјален Дамаск од март претрпела неколку големи воени порази, го загубила најголемиот дел од покраината Идлиб во северозападниот дел кој го контролира исламстичкиот сојуз предводен Џебхат ан-Нусра (Фронтот на победата), која е сириски огранок на Ал Каеда, а од исламистичките племенски сунитски групи обединети во ткн „Јужен фронт“ кон границата со Јордан. Покрај тоа џихадистичката Исламска држава која ги контролира териториите кон границата со Турција, во мај го зазема и древниот град Палмира во централниот дел од земјата.

Големи подрачја на северот контролираат милициите на сириските Курди, со кои Асад практично не војува, и од нивните територии без борба уште пред три години ги повлече армиските гарнизони.

Иако сунитската вооружен политичка опозиција којашто ја поддржува Западот, а чија Слободна сириска армија (FSA) која практично контролира само мали џебови, тврди дека владата во Дамаск под контрола има само 25 отсто, на нив живеат огромното мнозинство од близу 20 милиони Сиријци кои останаа во земјата.

Асад во обраќањето на државната телевизија повтори дека поддршката од земјите кои ги поддржуваат бунтовниците, вклучително и радикалните исламисти, вклучително и Турција, се дел од причините за неодамнешните загуби кои предизвикале „очајување“ меѓу Сиријците. „Сирија е во војна којашто ја финансираат најбогатите и најмоќните држави“, истакна Асад притоа повалувајќи ја поддршката од Русија и Кина која ѝ ја даваат на Сирија особено во Советот за безбедност на ОН.

„Војската има сé, освен што и недостигаат луѓе. Но, и покрај тоа, сликата не е црна“, нагласи Асад кој претходно седмицава објави уште една амнестија за дезертерите и оние кои не се одѕвале на мобилизациите.

Меѓутоа, како и повеќепати во слични пригоди, сирискиот претседател порача дека нема да се предаде, како и дека нема компромисно решение. Го отфрли ставот дека Сирија оди кон поделба на териториите кои ги контролира владата во Дамаск и бунтовниците против кои се бори.

Според Асад, „разговорите за политичкото решени не сириската криза стануваа празни и бесмислени“. „Ова е решавачкиот период, не постојат компромисни решенија“, рече додавајќи дека не гледа „политичко решение за граѓанската војна во земјата, сé додека тероризмот не биде поразен“. Сепак сирискиот челник во обраќањето не се откажа сосема од дијалогот, велејќи дека тој го „поддржува секој политички дијалог, па дури и доколку тоа има минимално влијаени врз решавањето на кризата“./крај/мф/сн

Извор: Макфакс