Противниците на владата на Бангладеш нападнале во вторникот со запаллива бомба врз автобус полн со заспиени патници во источниот дел од државата, при што се убиени седум луѓе, а станува збор за последен во низата политички мотивирани напади коишто ја потресуваат земјата.

„Седум патници загинаа во автобусот по фрлање на запалива бомба околу четири часот наутро. Петмина се борат за живот, со изгореници од 40 до 80 отсто. Пренесени се во болница во главниот град“, изјавил за AFP началникот на полицијата во областа Тутул Чакрабарти.

Покрај седумте жртви, уште неколку патници се тешко повредени во нападот извршен во областа Чудограм, кој се припишува на Бангладешката национална партија којашто се смета за националистичка а ја води поранешната премиерка Халеде Зиоја којашто се обидува да ја урне владата на актуелната премиерка Шеика Хасин/

Со овие жртви на 53 се зголеми бројот на убиените лица, повеќето во напади со молотови коктели врз автобуси и камиони, од почетокот на блокадата на сообраќајот кој од почетокот на јануари го спроведува опозицијата за да изврши притисок за одржување предвремени парламентарни избори.

Властите, пак, настојуваат опозициската челничка којашто не излегува од својата канцеларија од 3-ти јануари, да се откаже од блокадата на сообраќајот и да го прекине насилството.

Бангладеш станал дел од Пакистан кога е укината британската колонијална управа во 1947 година. Тогаш се нарекувал Источен Пакистан, меѓутоа со помош на Индија во деветмесечната војна против Западен Пакистан, се избори за независност. Џамат-е-Ислами и некои други партии се противеа на отцепувањето од муслиманскиот Пакистан.

Непријателствата во Бангалдеш траат по војната од 1971 година којашто заврши со создавање на државата Бангладеш, а станува збор за покраина која од 1947 година беше во состав на Пакистан, и се нарекуваше Источен Бенгал а подоцна и Источен Пакистан.

Премиерката Шеика Хасина Вазед го воспостави Специјалниот суд за воени злосторства во 2010 година, откако првиот обид за судење на осомничените за убиства беше прекинат во 1975 година кога беше убиен Шеик Маџибух Рахман, втемелувач на државата Бангладеш и татко на сегашната премиерка.

Специјалниот суд досега подигна обвинение против 18 лица, главно од партијата Џамат-е-Ислами, по разни точки а смртни казни се изречени за 11 од нив. Партијата Џамат-е-Ислими се противеше на независноста во текот на конфликтот, а споменатите процеси ги отфрла како политички мотивирани.

Во текот на интервенцијата на Индија кон крајот на судирите во 1971 година, која што го најави брзиот пораз на пропакистанските сили, милициите кои беа наклонети кон Исламабад масакрираа десетици познати професори, режисери, уметници, лекари и новинари. Владата во 2010 година го формираше судот ICT и истакна дека тие процеси се неопходни за да се затворат сé уште отворените рани од војната за независност. Меѓутоа, исламистичката партија Џамат-е-Ислам ја обвинува владата дека го основала овој од политички мотиви, бидејќи најмногу им се суди на претставници на опозицијата. Организацијата Human Rights Watch ги критикуваше процедурите со кои не се почитуваат меѓународните норми.

На почетокот од август 2013 година судовите ја забранија исламистичката партија Џамат-е-Ислам, одлука која беше донесена пред одржување на изборите закажани за јануари годинава. Џамат ретко добива повеќе од 5 отсто гласови на изборите по 1970 година, но учествуваше во неколку коалициски влади.

Последните неколкуте години политичката и безбедносната ситуација во Бангладеш е влошена во врска судењата на лидерите на најголемата исламска партија во земјата Џамат-е-Ислами кои се обвинети за воени злосторства за време на војната за независност на Бангладеш од Пакистан во 1971 година. Според податоците на владата во војната од 1971 година загинале 3 милиони луѓе, додека независните организации проценуваат дека станува збор за меѓу 300 и 500 илјади жртви. Околу 90 отсто од 153-те милиони жители на Бангладеш се муслимани. Будистите претставуваат помалку од еден отсто од населението и живеат повеќето во југоисточните окрузи, во близина на границата со мнозинскиот будистички Мианмар.

На судење чекаат уште девет членови на партијата Џамат, и затоа на Бангладеш, претежно муслиманска земја, му се закануваат нови бранови насилство./крај/мф/сн

Извор: AFP