Белиот 28-годишен полицаец Дарен Вилсон кој во август смртно со шест истрели го уби десет години помладиот црн тинејџер Мајкл Браун во американското гратче Фергусон, предградие на Сен Луис во сојузната држава Мисури, и кој во понеделникот од големата пората беше ослободен од одговорноста што предизвика расни немири низ САД, смета дека во инцидентот постапил правилно и ја исполнил процедурата.

Според полицијата, Вилсон го застрелал Браун во полициско возило откако се кошкале околу пиштол, а полицаецот подоцна побарал медицинска помош во локалната болница поради повреда на лицето. Меѓутоа, очевидци велат дека напротив, момчето било убиено надвор од полициското возило и тоа додека ги држело во воздух рацете во знак на предавање.

„Јас својата работа ја извршив исправно“, изјави полицаецот Дарен Вилсон во интервју за американската телевизиска мрежа ABC.

Одговарајќи на прашањето на новинарот кој со Вилсон се сретнал на тајна локација, дали би постапил поинаку доколку Мајкл Браун бил белец, полицаецот одговори одречно. „Сé што сакав во тој момент, беше да живеам“, рече Вилсон.

Одрекува дека го застрелал Браун додека овој ги држел рацете кренати во воздух, како што изјавиле очевидци во сослушувањето пред големата порота. Вилсон, исто така, во интервјуто изрази и сочувство до семејството на афроамериканскиот тинејџер што го застрела.

Претходно во вторникот весникот The Independent, повикувајќи се на сведочењето на офицерот, што беше објавено од властите на државата Мисури, објави дека полицаецот Дарен Вилсон го споредил тинејџерот кого го застрела со „демон“,

„Се чувствував како петгодишно дете во рацете на Хулк Хоган“, го опишал судирот Вилсон со Браун во своето сведочење пред големата порота, којашто на крајот одлучи да го ослободи од судски прогон што предизвика гнев и протести на улиците на Фергусон.

Протести, и покрај апелите на семејството на убиениот Мајкл Браун и на американскиот претседател Барак Обама во Фергусон се претворија во безредија во кои се палеа и ограбуваа продавници, автомобили и приватни домови, во кои имаше 14 повредени од кои двајца со огнено оружје од кои еден полицаец, а 29 луѓе се уапсени. Во гратчето се распоредени 2.200 припадници на Националната гарда на САД, како превентива од повторувањето на насилните протести и криминалот. Протести по повод одлуката полицаецот Вилсон да биде ослободен од судски прогон, беа организирани и во Сент Луис, Њујорк, Сиетл, Чикаго, Вашингтон пред Белата куќа и во други места./крај/мф/сн

Извор: Макфакс