Како и што се предвидуваше, состанокот за Сирија кој го свика американскиот државен секретар Џон Кери во саботата вечерта во швајцарскиот град Лозана заврши по четиричасовните разговори без заедничка изјава на деветте шефови на дипломатиите на земјите кои учествуваа на разговорите, што значи дека и нема конкретни резултати, пренесуваат агенциите.

Пред почетокот на состанокот американскиот државен секретар Џон Кери и рускиот министер за надворешни работи Сергеј Лавров имаа состанок зад затворени врати, а подоцна им се придружија специјалниот пратеник на Обединетите нации за Сирија, Стефан де Мистура, и шефовите на дипломатии на земјите од регионот, како Турција, Саудиска Арабија и Катар, кои ги поддржуваат сунитските бунтовници против сирискиот алавитски (шиитски) претседател Башар ал-Асад, и на Иран кој ја поддржува владата и војската на владата во Дамаск. Покрај нив, на средбата во Лозана учествуваа и првите дипломати на Египет, Ирак и Јордан, кој се неутрални во сирискиот конфликт.

„Средбата беше можност за размена на нови идеи, за да се покрене процесот кон прекинот на огнот. Имаше некои тешки моменти, имаше очигледно тензии, но сите беа конструктивни… Немаше гнев“, изјави Кери по состанокот и додал дека „тоа е токму она што го посакувавме“.

Постигнат е консензус „за бројни можности“ кои би воделе кон прекин на огнот во Сирија, додаде американскиот државен секретар и најави за понеделник нови контакти меѓу страните во преговорите, пренесува Reuters.

Учесниците на милтилатералните разговори за Сирија во Лозана разгледуваа неколку интересни идеи и се договорија да ги продолжат контактите во најскоро време, изјави Лавров за руските медиуми.

„Има неколку идеи, кои денеска беа дискутирани во овој круг (од разговорите), на кој беа присутни многу влијателни земји, кои можат да влијаат врз ситуацијата.., се договоривме да ги продолжиме контактите во следните денови, сметајќи на некаков договор, кој ќе помогне во промовирањето на решение“, рече шефот на руската дипломатија, кого го цитира агенцијата РИА.

Европската унија немаше свој претставник на состанокот во Лозана, но Кери во недела ќе отпатува за Лондон каде што ќе ги информира европските сојузници.

Новиот круг дипломатски напори за постигнување решение во Сирија во кој учествуваат Лавров и Кери, е првиот организиран по 3-ти октомври кога Вашингтон еднострано го суспендираше билатералниот разговори со Москва обвинувајќи ја дека не ги исполнува преземените обврски за да се сопре крвопролевањето. Русија, пак ги обвини САД дека не го извршиле својот клучен дел од обврските да влијаат врз сунитските бунтовници кои ги поддржуваат да се дистанцираат од радикалните исламистички групи, како Џебхат ан-Нусра, сириското крило на Ал Каеда, кои се на листата терористички организации на ОН.

Неименуван западен дипломат во Лозана за Reuters рекол дека состанокот бил лоши подготвен и непрецизен во целите, а листата на учесници составена во последен момент.

„Состанокот би требало да донесе договор за Алепо и земјите би морале да ги исполнат своите обврски: Русија на тоа да престане да бомбардира, Иран да ја повлече својата милиција која му помага на режимот од Дамаск“, рекол за агенцијата тој дипломат, но не кажал ништо за американските обврски од договорот./крај/мф/сн

Извор: Макфакс