Американските медиуми сметаат дека „битка за Сенатот“ може да се наречат тамошните парламентарни избори во вторник на коишто Демократската партија, која веќе е малцинска во Претставничкиот дом, лесно може да ја загуби контролата и над Сенатот и така претседателот Барак Обама да го остави без последното упориште во Конгресот.

Повеќе од 146 милиони Американци со право на глас во вторник ќе гласаат за сите 435 пратеници во Претставничкиот дом, кој инаку целосно се обновува на секои две години, Во овој дом Републиканската партија има мнозинство од 2010 година и според сите анкети таа превласт неизоставно ќе ја задржи. Уште повеќе, според аналитичарите, ќе ја зголеми и досегашната разлика од 234 наспроти 201 пратеник.Сепак во фокусот се изборите за Сенатот. Тие се парцијални, бидејќи на секои две години се обновуваат третина од мандатите, па од вкупно сто места се пополнуваат 36. Демократите имаат мнозинство од 53 наспроти 45 мандати, со два независни пратеника. Републиканците посакуваат контрола и над овој дом на Конгресот, а за да го остварат тоа мора на демократите да им преземат шест мандати. Во нивна полза оди и непопуларноста на претседателот Обама, кого според последните анкети не го поддржуваат 58 отсто од американските избирачи.Професорот Џејмс Тарбер од универзитетот Американ оценува дека идниот Конгрес, доколку со него целосно завладеат републиканците, на администрацијата на претседателот Обама во последните две години од неговиот мандат ќе ѝ донесе повеќе блокади, повеќе поларизирање и потешко владеење. „Ќе биде реализирано многу малку од законските програми на претседателот Обама“, смета Тарбер.За републиканците приоритет ќе биде целосното или делумно укинување на реформите на здравствениот систем познати како Обамакер од 2010 година. Со тие прашања, според предвидувањата, би требало да се занимава идниот состав на Конгресот чиј мандат започнува во јануари 2015 и трае до јануари 2017 година, кога должноста ќе ја преземе и новиот американски претседател.Сегашниот политички пејзаж во САД ѝ оди во прилог на Републиканската парија да ги преземе Сенатот, и демократите се навистина во незавидна позиција. Според анкетите, во сојузните држави Јужна Дакота, Западна Вирџинија и во Монтана, демократските сенатори имаат малку шанси да бидат реизбрани. Во десет други неизвесни трки, четири се во државите во кои Мит Ромни го победи Барак Обама на претседателските избори во 2012 година. Нема да им биде лесно ниту на демократите на конзервативниот југ кои во Сенатот влегоа на бранот одушевување од Обама при неговиот први избор во 2008 година. Од друга страна, само три актуелни републикански мандата се загрозени. Во таа математика, изборниот ден за демократите на крајот би можел да го спаси Канзас, каде независниот кандидат би можел да го победи републиканскиот ветеран Пат Робертс.Иако демократите последниот период почнаа да се дистанцираат од претседателот Обама, републиканците сакаат на овие парламентарни избори да им дадат значење на референдум против него и се фокусираа што повеќе да го инволвираат во предизборната трка. „Одлуката којашто Американците треба да ја донесат е јасна и појасна не може да биде: глас за демократскиот кандидат е глас за политиката на Обама“, изјави републиканскиот челник Рејнс Приебас. Поради тоа демократите на коишто им истекува мандатот редовно ја истакнуваа својата независност од политиките на Белата куќа. „Претседателот не е релевантен. За две години тој веќе нема да биде тука (во Белата куќа –з р.)“, порача викендов сенаторот од Алјаска, Марк Бегич. Претседателот Обама ја сфати реалноста и не се спротистави на таквата стратегија на своите демократски сенатори, а своето учество го сведе само на присуство на донаторските гала вечери. Правата дама Мишел Обама не се појавуваше на одредени собири за да им помогне на некои од кандидатите, а голема активност имаше поранешниот демократски претседател Бил Клинтон и неговата сопруга поранешната државна секретарка Хилари Клинтон во државите како Кентаки, каде што Обама го има статусот на непожелно лице.Изборните резултати можеби нема да бидат веднаш познати, Имено, двете држави, Луизијана и Џорџија, ќе го одржат вториот круг на 6-ти декември, односно на 6-ти јануари, доколку ниеден од кандидатите не добие апсолутно мнозинство, а таквата можност е голема поради независните кандидати.Интересно е што и покрај вака остриот судир, голем проблем за политичарите на овие збори претставуваше како да се привлече вниманието на гласачите. Според испитувањата на јавното мнение, Американците во моментов повеќе се фокусирани на вестите за проблемите со епидемијата на еболата и заканите од џихадистите на Исламската држава, а изборната кампања позаинтересирано ја следеле само 15 отсто./крај/мф/сн

Извор: Макфакс