Радикалната исламистичка група Боко Харам ја преземала контролата на најмалку 25 градови во североисточна Нигерија, изјави за AFP католички бискуп од таа област, загрижен за наглото влошување на безбедносната ситуација.
 

Радикалната исламистичка група Боко Харам ја преземала контролата на најмалку 25 градови во североисточна Нигерија, изјави за AFP католички бискуп од таа област, загрижен за наглото влошување на безбедносната ситуација.

Според бискупот Оливер Даше, последниот месец во рацете на бунтовниците паднале десет градови во сојузната нигериска држава Јоба, исто толку во државата Борно и пет во Адамави. Исламистите тврдат дека исто како и џихадистичката Исламска дражва во Сирија и во Ирак, на ова подрачје во Нигерија воспоставиле калифат.

На Нигерија и’ е потребна меѓународна помош во решавањето на овој проблем, рекол бискупот Даше, кој во средата говореше на конференцијата на нигериските католички бискупи во Вари, во делтата на реката Нигер, во јужниот дел од земјата. „Како држава речиси ја загубивме оваа битка. Колку побрзо ќе се обединиме како Нигеријци, без оглед на верата, националноста и регионалните, културните и идеолошките разлики, тоа ќе биде подобро за нас“, истакнал бискупот.

Нигериската влада засега негира дека во судирот со Ноко Харам загубила контрола над дел од териториите и ја оценува како „бесмислица“ изјавата на Абубакар Шеку, лидерот на оваа исламистичка група, според кој градовите се заземени во текот на август и вклучени се во калифатот.

Многу е тешко независно да се проверат информациите за заземањето на селата и градовите во споменатите области со коишто речиси е невозможно да се стапи во контакт преку телефонските линии, истакнуваат локалните медиуми и странските агенции. Повеќето информации доаѓаат од населението коешто во илјадници ги напушти своите домови и пребега во другите области.

Нигериската армија на почетокот од септември призна дека бунтот на Боко Харам му се заканува на суверенитетот на земјата. Меѓутоа тврди дека ја преземала контролата над повеќе градови.

Бискупот Даше ја обвини владата за „речиси целосна пасивност“ во околности на сé поголема несигурност и за „рамнодушност“, додека момчиња насилно се врбуваат во исламистичките групи а жените насилно се венчаваат за бунтовниците. „Владата (…) нé разочара, ја загубивме сета доверба во владата и во нашите челници“, заклучи бискупот.Боко Харам пет години води вооружен бунт, главно концентриран во североисточна Нигерија. Само досега во 2014 година Боко Харам ја презема одговорноста за смртта на повеќе од 2.500 луѓе во цела Нигерија. Кога во 2009 година првпат јавно го призна своето постоење, оваа радикална исламистичка група којашто некои ја сметаат за секта, ги напаѓаше само христијаните во желбата да ги протера или преобрати за од Нигерија да направи исламска држава во којашто ќе владее шеријатот, меѓутоа од 2013 година цел ѝ се и припадниците на безбедносните сили и цивилите, како христијани, така и муслимани.

Боко Харам инаку е основана во 2002 година како секта на салфитите, кои во прво време сакаа да прогласат исламска држава во северна Нигерија. Од тогаш, според нигериските власти, во нејзините терористички акти загинале над 10 илјади луѓе. Групата којашто го забранува западниот модел на образование, а особено на жените, извршува напади и врз училишни комплекси и интернати, а во еден таков од април годинава градот Чибок киднапираше 276 ученички од кои успеаја да побегнат 57, но судбината на 219 сѐ уште е непозната.

Исламистичката групација Боко Харам е активна во северните и централните делови на Нигерија каде што мнозинството население се муслимани, и се залага за укинување на западниот модел на образованието и воведување на строгите шеријатски прописи во целата земја. Групата која е поврзана со глобалната терористичка мрежа Ал Каеда, ја презема одговорноста за многу терористички напади и стои зад други вооружени напади врз верски објекти и села.

Иако нигериската армија објави дека е ликвидиран лидерот на Боко Харам, Абубакар Шеку, веројатно во периодот меѓу 25-ти јули и 4-ти август 2013 година, од раните што ги здобил во размена на огнот со безбедносните сили, исламистите од оваа група не престануваа со нападите. Наводната смрт на Шеку не влијаеше позначително врз намалувањето на интензитетот на акциите на исламистите, но сепак Боко Харем дејствува помалку моќно откако претседателот Гудлак Џонатан минатата година прогласи вонредна состојба во три северни сојузни држави и во мај 2013 година покрена офанзива против групата. Бунтот во почетокот беше ослабен со овие операции, меѓутоа и натаму има спорадични герилски напади. Подоцна се покажа и дека смртта на Шеку била непотврдена информација.

Во Нигерија последните месеци се разжестува бунтот на исламистите чии упоришта се во североисточниот дел од земјата, каде што е прогласена вонредна состојба. Судири меѓу муслиманските милитанти и нигериската војска се разгоруваат повремено во регионите Борно, Потискум и Јоба. Спорадични пресметки има и во провинцијата Вудилу, на околу 20 километри од Кано, најголем град во северниот дел од Нигерија, како и во Баучи, во една од 12-тe провинции во северна Нигерија со мнозинско муслиманско население. Таму пред девет години почна да спроведува шеријатско право, што предизвика судири меѓу муслиманите и припадниците на локалното христијанско малцинство, и оттогаш во судирите се убиени повеќе од илјада лица.

За нападите врз христијаните во Нигерија одговорноста редовно ја презема радикалната исламистичка група Боко Харам, основана во 2002 година која бара воведување на шеријатот (исламскиот закон) во Нигерија и искоренување на западниот секуларен модел на образование. Нејзините борци беа вклучени во неколку терористички напади во 2011 година, вклучително и врз седиштето на Обединетите нации во главниот град Абуџа. Боко Харам е обвинета за убиствата на повеќе од илјада луѓе во терористичките напади коишто ги интензивираше од 2009 година.

Нигерија е составена од вкупно 36 сојузни држави и има население од околу 160 милиони, кои речиси по половина се христијани на југот и муслимани на северот, но милиони од нив живеат и на север и на југ.

Според Меѓународната кризна група чие седиште е во Брисел, само во етничките и верските конфликти во Нигерија во периодот меѓу 1999 и 2009 година загинале повеќе до 14 илјади луѓе.

Нигерија е најголемиот производител на нафта во Африка, и извезува околу 2,2 милиони барели нафта дневно. Меѓутоа, нафтената индустрија во земјата трпи загуби поради честите напади што ги изведуваат борците на Движењето за ослободување на делтата на Нигер и други вооружени групи, врз објекти на „Chevron”, „Shell” и други нафтени компании./крај/мф/сн

Извор: Макфакс