Според најновите податоци ураганот Метју усмртил 842 луѓе, а десетици илјади останаа бездомници во најсиромашната карипска држава Хаити, а во петокот ја погоди северната американска сојузна држава Флорида, донесувајќи ветришта со брзина од 230 километри на час кои ја уриваат инфраструктурата и корнат дрвја, како и обилни дождови кои се закануваат со поплави.

Бројот на мртвите на Хаити се зголеми 842 во петокот кога пристигнале информациите за жртвите од оддалечените подрачја кои беа отсечени поради бурата, пренесува Reuters повикувајќи се на податоците од властите.

Во округот Гранд-Анс, на југозападот од Хаити, кој најмногу настрадал во стихијата, повеќе до 21.000 луѓе биле принудени да побараат засолниште поради разурнатите домови. Властите на цивилната авијација објавија дека на југот од земјата регистрирале 3.214 разурнати домови. Најмалку 350.000 луѓе имаат потреба до помош по минувањето на циклонот, пренесува AFP.

Сезоната на урагани на Атлaнтикот трае од 1-ви јуни до 30-ти ноември. Атмосферскиот феномен е класифициран како тропска бура и добива свое име, доколку брзината на ветрот во неговиот епицентар достигнува 63 километри на час. При брзини на ветрот од 118 километри на час и повеќе, бурата преминува во ураган.

До Метју, последниот ураган од четврта категорија кој го зафатил Хаити се случил во 1963 година, кога загинале околу 8.000 луѓе.

Метју, исто така, е првиот голем ураган во повеќе од последните десет години кој директно им се заканува на САД и поради него таму беа спроведени масовни евакуации на населението од бреговите на Флорида преку сојузните држави Џорџија и Северна и Јужна Каролина.

Јужниот дел на Флорида ја избегна најлошата бура во текот на ноќта кон петокот, но претседателот Барак Обама и другите функционери го повикаа населението да биде крајно претпазливо, бидејќи може да се покаже дека Метју е најголемиот ураган кој ја погодил североисточна Флорида во повеќе од 100 години.

„Сакам да им нагласам на сите дека ова е навистина опaсен ураган, дека постои можност од загуби на животи и големи материјални штети. Луѓето мора да ги следат упатствата на локалните функционери следните, 24, 48 и 72 часа“, предупреди претседателот Обама.

Во историскиот град Сент Аугустин, јужно од Џексонвил, половината од 14.000 жители одбиле да се евакуираат, во прв ред постари лица и сиромашни работници, а се покажало дека некои семејства немаат возила или други превозни средства за да се засолнат, соопшти градоначалничката Ненси Шејвер.

А токму недостигот од превозни средства беше една од причините што многу жители на Њу Орлеанс не се засолнаа на безбедно во 2005 година кога овој град беше погоден од ураганот Катрина кој усмрти повеќе од 1.800 луѓе на брегот од Мексиканскиот залив.

Првата жртва од ураганот на Флорида е жена на околу педесет години која добила срцев удар и поради бурата не можела да биде пренесена до болница, па починала.

Околу 600.000 домаќинства на Флорида останаа без електрична енергија, а поплавите се закануваат на областа кај Џексонвил. Во петокот утрото по локално време околу 22.000 жители биле сместени во засолништа, а многумина уште претходните денови заминале во внатрешноста на копното. Сојузните држави Џорџија и Јужна Каролинa, исто така, отворија десетина засолништа за евакуираните.

Во Кејп Канаверал на Флорида, од космодромот од кој се лансираат ракети, ветровите го уништиле покривот на лансирниот центар на вселенската агенција NASA. Предупредувањето за ураган е проширено од јужна Флорида кон сојузните држави Џорџија и Јужна Каролина./крај/мф/сн

Извор: Макфакс