Многубројни семејства кои долго време се целосно опколени во бунтовничките квартови во Алепо од владините сили, го напуштаат градот по хуманитарните коридори кои ги отвори владата во Дамаск, извести во саботата службената новинска агенција SANA, а телевизијата al-Ihbaruya пренесува дека вториот по големина сириски град го напуштаат и бунтовниците кои го положуваат оружјето и им се предаваат на владините сили.

Според репортерот на телевизијата, со првата група цивилни бегалци од Алепо излегла и група бунтовници, кои ги положиле пешадиското оружје. „Сите тие беа Сиријци, странски наемници немаше меѓу нив“, јави репортерот Анас Рамадан. Додаде дека нема сознанија на која од бунтовничките групи ѝ припаѓале овие борци.

И агенцијата SANA наведува дека дел од бунтовниците го предале оружјето, но не го прецизира нивниот број. Телевизијата и агенцијата објавуваат снимки на жени облечени во црна облека како со деца во колона ја минуваат улицата опустошена во повеќе од петгодишната војна, а ги дочекуваат и во автобуси ги сместуваат војници.

Во саботата доцна попладнето се очекуваше да започне евакуацијата на втората цивилите од Алепо. Не е исклучено на евакуацијата да ѝ се приклучат припадници на вооружените опозициски групи коишто сакаат да ја искористат општата амнестија којашто ја прогласи сирискиот претседател Башар ал-Асад.

И опозициската Сириска опсерваторија за човекови права (SOHR) извести во саботата за излегувањето на „бројни цивили“ од источниот опколен дел од градот Алепо кон кој сириската армија ги прекина сите приоди, преку коридорот низ квартот Салахедин.

„Десетици семејства утрово излегоа од источните квартови на Алепо преку хуманитарните коридори отворени за да се евакуираат граѓаните од деловите на градот под окупација на терористичките групи“, пренесува агенцијата SANAи додава дека „ги дочекаа војници кои потоа со автобуси ги превезоа до привременото засолниште“.

Според указот на сирискиот претседател Башар ал-Асад од 28-ми јули, „сите кои земаа оружје во рацете, во рок од три месеца треба да им се предадат на властите и да ја минат процедурата за проверка во правосудните органи, за да се вратат во нормалниот живот“.

Во своето обраќање до своите сограѓани, Асад во директниот телевизиски пренос рече дека „сите Сиријци кои земале оружје в рацете треба да ја искористат оваа можност и да се вратат во прегратките на татковината“. „Неопходно е да се стави крај на насилството и целосно вклучување во процесот за обновување на земјата… Националното помирување е единствениот излез од она што се случува во Сирија“, порача во четвртокот Асад.

Според телевизијата al-Ihbariya, владините сили и сојузничките локални милиции ги продолжуваат операциите против остатоците од вооружените групи во северните и западните периферни делови на Алепо. Борби се водат во ел-Џамаија и Захрат Абд Рабо, како и во областа на кампот на палестинските беглаци Хандарат.

Од 17-ти јули во населбите кои беа под контрола на различните бунтовнички групи во Алепо, опколени се околу 250.000 жители кои немаат основни животни продукти. Поради тоа, сириската влада по иницијатива на нејзината сојузничка Русија откако беше отворен коридорот преку кој од обрачот можат да се извлечат цивилите и бунтовничките кои сакаат да го предадат оружјето, започна и хуманитарен конвој во чии намери изразија сомневање западните сојузници на сириската сунитска вооружена опозиција предводени од САД.

Финансиската престолнина на Сирија, која пред почетокот на војната во март 2011 година имаше 2,2 милиони жители, од 2012 година е поделена. Владините сили и ним сојузничките милиции контролираат малку помалку од две третини од Алепо, главно западните квартови, и последните месеци направија пробив кон источните кварт откако ги заземаа главните правци за снабдување на бунтовниците.

Повторното заземање на источните делови од Алепо за силите на владата во Дамаск ќе претставува голема победа и може да претставува крај на бунтовничката превласт во целата истоимена покраина која и онака беше ослабена со јакнењето на џихадистичките групи. Аналитичарите уште пред две години предвидуваат дека воспоставувањето на целосна контрола над Алепо ќе значи пресвртница во сириската војна во полза на владините сили./крај/мф/сн

Извор: Макфакс