Џихадистите од екстремната сунитска група Исламска држава, го заземаа во четвртокот навечер и последниот граничен премин на сириско-ирачката граница кој беше во рацете на силите лојални на алавитскиот (шиитски) претседател Башар ал-Асад, објави опозициската Сириска опсерваторија за човекови права (SOHR) со седиште во Лондон, а џихадистите веќе контролираат половина од сириската територија.

„Борците на Исламската држава го заземаа граничниот премин ал-Танаф на границата со Ирак (…) откако режимските сили се повлекоа. Режимот нема повеќе никаква контрола над границата со Ирак“, се вели во објавата на SOHR, невладина организација којашто ја води сопственик на сириски ресторан во Лондон и е проклонета кон сириската сунитска вооружена опозиција којашто ја има поддршката од Западот и сунитските земји во регионот.

Граничниот премин ал-Танаф, кој во Ирак се вика ал-Валид, е 240 километри оддалечен од историскиот град Тадмур (арапски назив за Палмира) кој Исламската држава го зазема во средата. Со освојување на овој град стар повеќе од две илјади години, а сместен на крстосувањето на патиштата коишто водат во големата сириска пустина и границата со Ирак, Исламската држава сега контролира половина од сириската територија и му се заканува на Хомс, третиот по големина град во Сирија.

Агенцијата на Обединетите нации за човекови права процени во четвртокот дека од Палмира веќе избегале најмалку третина од жителите на овој град со 200.000 население. Портпаролката на УНХЦР, Равина Шандасани во Женева се повика на веродостојни извори и рече дека се чини дека владините изли го спречувале заминувањето на цивилите, додека и самите не се повлекле. „Изгледа дека Исламската држава оди од врата до врата и бара луѓе поврзани со режимот“, рекла пренесе Reuters. Според вообичаената практика сунитските џихадисти се одмаздуваат на шиитите, коишто ги сметаат за еретици, и на христијаните, особено оние кои нема да го прифатат сунитскиот ислам.

Според агенцијата DPA, биле погубени најмалку 17 цивили во Палмира. SOHR, пак објави дека бројот на бруталните погубувања на цивили во пустината во централна Сирија се зголемил на 66 во последната седмица. Опсерваторијата објави дека Исламската држава сега контролира повеќе од половина од сириската територија. Припадниците на оваа група којашто се одметна од Ал Каеда, се присутни во 9 од 14 сириски покраини, повеќето на истокот и северот со земјата, покрај ирачката граница. Од летото 2014 година заземајќи и големи делови од Ирак, Исламската држава на нив прогласи ткн калифат каде што го спроведува своето ригидно толкување на исламот.

Исламската држава ги контролира сите главни сириски нафтени и гасни полиња, освен ал=Шар, кој е под надзор на владата во Дамаск во пустинската област на Палмира, како и полињата Рами, кои ги надзираат курдските милиции во регионот ал-Хасакех, исто така, крај границата со Ирак.

Меѓутоа, џихадистите кои го заземаа целиот град Палмира во средата, на другите боишта трпат загуби. SOHR јави дека курдските Единици за заштита на народот (YPG) во четвртокот заземале четири села во долината на Кабур, западно од ал-Хасекех. Претходно во средата Курдите ги потиснаа џихадистите и од горскиот венец Џабал Абдул Азиз, северозападно од градот. Исламската држава во февруари во нападите на селата на асирските христијани во долината Кабур грабнаа најмалку 200 луѓе, од кои досега малкумина се ослободени.

Откако во средата исламистите ја заземаа Палмира, градот кој е под заштита на УНЕСКО, се стравува за судбината на овој голем и значаен локалитет вброен на листата на културното наследство на човештвото. „Палмира е вонредна локација на културното наследство во пустината. Секое оштетување на Палмира не е само воено злосторство, туку и голема загуба за човештвото, изјави за германската агенција DPA, Ирина Бокова, главната директорка на УНЕСКО.

Францускиот претседател Франсоа Оланд повика во четвртокот навечер откако пристигна на европскиот самит во Рига на „дејствување“ против терористичката закана, по заземањето на Палмира, пренесува AFP.

„Мораме да дејствуваме затоа што постои закана за спомениците од листата на светското културно наследство, и истовремено мораме да дејствуваме против daesh (погрден акроним за Исламската држава, на арапски – з.м.), рече Оланд.

„Покрај тоа, треба да се бара политичко решение во Сирија, што Франција го прави, одамна…. Групата Исламска држава, но и сирискиот режим, секојдневно почнуваат борби и ги изложуваат цивилите на притисок“, рече францускиот претседател./крај/мф/сн

Извор: Макфакс