Сириската армија со поддршка на провладините милиции извела големи напади врз позициите на џихадистичката Исламска држава во предградијата на древниот град Палмира, во североисточниот дел од Сирија, убивајќи десетици нејзини припадници, а преживеаните масовно се повлекуваат, пренесува порталот Syria News, додека државната сириска агенција SANA во неделата вечерта повикувајќи се на безбедносни извори објави дека сириските владини сили заедно со курдски борци напредуваат во стратешки важниот североисточен град Хасака.

Либанската телевизија al-Mayadin објави дека по успешните воздушни напади и копнени операции на сириската армија, војниците и провладините милиции успеале да заземат под контрола поголем дел од возвишувањата околу градот Палмира, и да се пробија во длабочината на линијата на фронтот.

Сириската армија на 8-ми јули започна контраофанзива во областа на градот Палмира, напредувајќи за еден ден 11 километри во длабочината на линијата на судирот, но напредувањето беше запрено на три до четири километри од остатоците од древниот град. Според официјалните претставници на владата во Дамаск, нападот бил запрен поради минираните приоди кои водат кон градот.

Палмира, или како што ја нарекуваат пустинската Венеција, е една од шесте локации во Сирија кои се под заштита на УНЕСКО како културно наследство на човештвото, со нејзините сводови и амфитеатри кои датираат од римскиот период, а Исламската држава го зазема во мај годинава. Пред повлекувањето сирската армија го евакуираше поголемиот дел од локалното население и најзначајните археолошки експонати од централниот музеј. Според непотврдени информации, по заземањето на градот џихадистите го ограбиле остатокот од музејските поставки и уништиле дел од древните храмови.

Сириските државни медиуми во неделата јавија, исто така, дека силите на владата во Дамаск заедно со курдските борци ги потиснале борците на Исламската држава во два мали реона во областа на градот Хасака. Гувернерот на покраината ал-Хасака, изјавил за агенцијата SANA дека „армиските сили и милициите се во завршната фаза од прогласувањето на градот Хасака за целосно безбеден“.

Курдските сили биле помогнати од сириската армија да ја осигурат контролата на областа Западна ал-Нашва од Хасака. Според медиумите, жителите кои претходно побегнале пред џихадистите, постепено се враќаат во населбите во регионот.

Исламската држава на 25-ти јуни ја почна својата офанзива врз Хасака, заземајќи неколку големи населби и главниот град на истоимената покраина, пред да започне возвратниот удар на локалните милиции помогнати од армијата.

Во оваа провинција е етнички и конфесионално мешана, и во неа живеат Арапи, Курди, Туркмени и Асирци.

Повеќе од 230.000 луѓе загинаа во Сирија од започнувањето на конфликтот во март 2011 година, како дел од ткн Арапска пролет, кој се претвори во конфесионален судир во кој се појавија две моќни џихадистички организации, како Исламската држава и Фронтот ан-Нусра, која е сириско крило на Ал Каеда, Според Обединетите нации, повеќе од 7,2 милиони луѓе се внатрешно раселени, а повеќе од три милиони биле принудени да ја напуштат татковината./крај/мф/сн

Извор: Макфакс