Припадниците на џихадистичката организација Исламска држава подметнале мини и бомби под централниот на древниот сириски град Палмира во кој има остатоци од грандиозни градби од римскиот период, објави во неделата опозицската Сириска опсерваторија за човекови права (SOHR) со седиште во Лондон, повикувајќи се на сознанијата на своите активисти на теренот.

Челникот на SOHR наведува дека засега не е јасно дали Исламската држава се подготвува да го крене во воздух древниот град или нејзините борци поставиле мини за да ги спречат владините сили во напредувањето кон овој град, кој на арапски се вика ал-Тадмур.

„Ги поставиле во саботата. Неколку се оставени во околината на римскиот амфитеатар, засега не ја знаеме вистинската цел“, изјави Рахман Абдулрахман, директор на Опсерваторијата за AFP.

Махмуд Абдулкарим, функционер задолжен за старини во владата на сирискиот претседател Башар ал-Асад, ги потврдил информациите за минирањето на Палмира. „Градот е заложник во нивните раце, ситуацијата е многу опасна“, изјави Абдулкарим за сириските медиуми. Палмира се наоѓа на југозападните рабови на современиот град Тадмур.

Исламската држава, која се претставува како ултрарадикална сунитска група со своето ригидно практикување на исламот, во мај годинава го окупираше градот со 50.000 жители во чија близина е археолошки локалитет викан и „бисерот или Венеција на пустината“, кој на светски ниво е познат како едно од најбогатите и најдобро зачувани останки на грабни од римскиот период. Градот Палмира е ставен на листата на заштитено светското културно наследство на УНЕСКО, сместен е 240 километри североисточно од сириската престолнина Дамаск и е познат по зачуваните римски колонади, храмови и надгробни споменици.

Исламската држава прогласи калифат како централна власт над сите муслимани кои живеат на териториите кои ги зазема во Сирија и соседен Ирак, со вкупна површина како Велика Британија. Нејзините припадници кои велат дека се во света војна (џихад) го згрозија светот со бруталните и масовни погубувања на локално население на областите кои ги контролираат и на западни заложници.Припадниците на радикалната сунитска организација Исламска држава станаа познати и по тоа што изминатите месеци ги урнаа и археолошките остатоци од древниот асирски град Дур-Шарукин, во близина со гратчето Хорасабад, 15 километри североисточно од Мосул. Дур-Шарукин е асирски град подигнат од царот Саргон Втори, во периодот кога Асирија била најмоќната земја во тогашниот свет.

Џихадистичката групација Исламска држава во април објави на интернет видео записи на кои нејзините припадници со пукање од пушки и копачи уништуваат споменици на културата во Хатра. Некогашниот партски град Хатра, во провинцијата Нанива, е древен град стар повеќе од две илјади години, кој од 1987 година е прогласена са археолошки локалитет од светското културно наследство, се наоѓа на 110 со километри јужно од Мосул, во северен Ирак.

Советот за безбедност на ОН на 12-ти февруари годинава, ја усвои Резолуцијата 2199 со која за засилува забраната за трговија со антиквитети и културни вредности со коишто се финансира тероризмот./крај/мф/сн

Извор: Макфакс