Припадниците на екстремната сунитска организација Исламска држава објавија снимка на којашто се гледа како експлозија го разорува храмот стар три илјади години во асирскиот град Нимруд, на северот од Ирак, во нивниот најнов напад врз едно од најголемите археолошки и историски богатства на светот.
 

Припадниците на екстремната сунитска организација Исламска држава објавија снимка на којашто се гледа како експлозија го разорува храмот стар три илјади години во асирскиот град Нимруд, на северот од Ирак, во нивниот најнов напад врз едно од најголемите археолошки и историски богатства на светот.

Обединетите нации во изјава од ноќта кон четвртокот потврдија дека сателитските снимки покажуваат „голема штета на главниот влез во храмот“ посветен на вавилонскиот бог на мудроста Набуу.

Древниот асирски град Нимруд се наоѓа на реката Тигрис, 20 километри југоисточно од Мосул, кој екстремната сунитска групација Исламска држава го контролира од јуни 2014 година, а во Библијата се среќава под името Калах. Изграден е за време на владеењето на асирскиот крал Шалманесер, меѓу 1274 и 1245 година пред Христа и своевремено бил престолнина на новото асирска царство, во тој период најмоќната држава на светот.

Датумот на видео снимката не е позната, а агенцијата Reuters во четвртокот објави дека не можела од независни извори да ја потврди нејзината автентичност.

На снимката се гледаат булдожери како ја уриваат древната „Порта на Нергал“, дел од историските градски ѕидини на Мосул, за што беше објавено претходно годинава. Брадест маж на видео снимката вели дека целта на оваа деструкција е да се спречат муслиманите да се вратат кон идолатријата.

Според апсолутистичкото толкување на исламот, џихадистите тврдат дека скулптурите и кралските гробници се идоли и затоа мора да бидат уништени. Џихадистите пред разорувањето темелно го ограбиле локалитетот, а ирачките функционери и претходно истакнуваа дека џихадистите ги ограбуваат уметничките дела и антиквитетите и ги продаваат на нелегалниот пазар со што делумно ја финансираат својата војна. Археолозите нападот врз ирачкото културно наследство го споредија со талибанското уривање на џиновските Буди во Бамијан во 2001 година во Авганистан, меѓутоа проценуваат дека штетата во Ирак е многу поголема и позначителна.

Денешен Ирак се простира на просторот на колепката на цивилизацијата каде што се појавени првпат земјоделието и писмото меѓу теченијата на реките Тигрис и Еуфрат, пред повеќе од 5.000 години. Многу древни градови и царства се дел од светсктоо културно наследство и библискиот Стар завет. На ирачкиот југ, кој сé уште е поштеден до смртоносните и разурнувачки походи и грабежи, лежат градовите Вавилон, каде се наоѓало едно од седумте чуда на античкиот свет Семирамидините висечки градини, потоа градот Ур, родното место на библискиот патријарх Абрахам, како и градовите Самара, Багдад и Ктезифонт, царските престолнини на Арапите и на Персијците.

Кон крајот на јули 2014 година сунитските џихадисти од групата Исламска држава (IS – поранешната Исламска држава во Ирак и на Левантот – ISIL) опожарија древна црква од III век во северниот орачки град Мосул кој го држат под контрола од почетокот на нивниот бунт. Мосул е вториот по големина град во Ирак и центар на северната провинција Нинива. Претходно во јуни ‎сунитските радикални бунтовници ги разурнале светилиштата и џамиите во Мосул. Најмалку четири сунитски и суфиски светилишта, како и шест шиитски џамии се уништени во областите на северната ирачка провинција Нинива. Фотографиите кои на интернет ги објавија борците на џихадистичката група Исламска држава (IS), покажуваа булдожери кои уриваат сунитски и суфиски светилишта. Шиитските џамии биле уништени со експлозив, а беше објавено и дека џихадистите заземале и сквернавеле две христијански цркви. Од нив ги симнале крстовите и го истакнале црното знаме на џихадистичката група.

Слични акции на уништување на верски објекти и светилишта, особено од туѓи религии, презимаа припадниците на радикалното исламистичко движење Талибан во Авганистан каде што во 1998 година прогласија „исламски емират“. Во 2001 година, талибаните со ракети и експлозив го уништија еден од најпознатите во светот културно-историски споменици од пред-исламскиот период на Авганистан (меѓу III и V век) – издлабените во карпи гигантски статуи на Буда во авганистанската провинција Бамиан, коишто се сметаа за највисоките скулптури во светот од овој вид, и без заштитени од УНЕСКО.

Изминатите две години, пак, побунетите исламистите во северноафриканската држава Мали ги уриваа прочуените мавзолеи во Тимбукту, како и други историски и културно важни три зданија во овој митски град. Уништување на спомениците започна во Мали во јули 2012 кога припадници на радикалното исламистичко движење Ансар ал-Дин (Бранителите на верата) го уништија мавзолејот на шеикот Махмуд во Тимбукту и две други гробници на важни свети личности за исламот. Тие изјавија дека имаат намера да ги уништи сите 16 гробници коишто се вброени во списокот на светското културно наследство на УНЕСКО, оправдувајќи го вандализмот со „сѐ што не е ислам (според нивното толкување). не е добро и човек мора да му се поклонува само на Бог“./крај/мф/сн

Извор: Макфакс