Џихадистите од Исламската држава заробија 20 војници на турската армија во сириската провинција Халеб (Алепо), пренесе либанската телевизија al- Mayadin, а турската исламско-кознервативна влада доцна ноќта кон средата објави дека на парламентот му поднела предлог за кој ќе се разговара во четврток и со кој на армијата ќе ѝ се овозможи да интервенира против џихадистите во Ирак и во Сирија.

Според либанската телевизија, заробените турски војници го штителе гробот на предокот на владетелската династија на Османлиската империја Сулејман Шах, кој се наоѓа на сириска територија, но во договор со сириските власти за неговата безбедност се грижи Турција.Гробот на Сулејман Шах, дедото на османлискиот султан Осман Први, се наоѓа во близина на тврдината Џабер во близина на сириската метропола Алепо, во која до пред граѓанската војна започната во март 2011 година мнозинство од населението го сочинуваа алавитите (шиитите) и христијаните. Според договорот од 1921 година, гробницата е прогласена за турска енклава во Сирија и е постојано заштитувана од турската армија.Претходно за заштита на гробницата од можни напади на милитантите на Исламската држава, претходно зборуваше турскиот заменик премиер Булетн Аринч. Тој, исто така, изјави дека владата побарала од парламентот да го усвои барањето за употреба на воена сила во Сирија и во Ирак.Всушност со овој предлог за една година треба да се продолжи мандатот кој турската армија веќе го доби за интервенција во соседните земји, и предвидува можност за изведување воени операции на териториите на Ирак и на Сирија кои граничат со Турција, како и за стационирање и минување на странски војници низ земјата, изјави Аринч.„Текстот ги опфаќа сите опции. Ќе се одори сеопфатен мандат, така што во иднина нема да ни биде потребен нов предлог. Тоа е добар предлог, којшто, се надевам, ќе наиде на едногласно прифаќање“, рече Аринч за новинарите.Со овој владин предлог се прошируваат двата различни текста за коишто парламентот во Анкара гласаше секоја година. Документот всушност ѝ овозможува на Турција да „стори сѐ“ за да „на јужната копнена граница ги отстрани заканите по националната безбедност, коишто значително пораснаа“ по избувнувањето на граѓанската војна во Сирија во март 2011 година. На турската армија, исто така, ѝ се овозможува да „учествува, доколку е потребно, во акции и интервенции надвор од границите и за таа цел да испраќа војници во други земји“, се наведува во предлогот. Сунитска Турција којашто ја поддржува сунитската вооружена опозиција во борбата против шиитскиот претседател Башар ал-Асад, со Сирија има граница долга 1.250 километри. Во почетокот одбиваше да учествува во воената интервенција на коалицијата којашто ја предводат САД против џихадистите од Исламската држава, сепак сега го промени мислењето. САД бараат од Турција да ги интензивира напорите за борбата против Исламската држава по кризата со 46 турски државјани, како и тројца ирачки службеници кои беа земени во заложништво од Исламската држава на почетокот од нејзината офанзива на 8-ми јуни кога го освоија вториот по големина ирачки град Мосул, а беа ослободени на 22-ри септември. Анкара досега инсистираше на самостојни одлуки и повеќепати нејзините челници соопштија дека земјата нема да земе учество во интервенцијата, но ќе дејствива во заштитата на своите национални интереси.САД од минатата седмица со петте сунитски арапски земји презема воздушни напади врз позициите на џихадистите во Сирија, од групите Исламска држава, Џебхат (Фронтот) ан-Нусра и Хорасан во провинциите Рака, Алепо и Деир ез-Зор на северот, истокот и североистокот на Сирија./крај/мф/сн

Извор: Макфакс