Американската телевизија PBS прикажа во вторникот документарен филм во кој првпат се опишува како сунитската џихадистичка организација Исламска држава (IS) обучува деца за војување во Авганистан.

Во филмот „Исламската држава во Авганистан“, кој ризикувајќи си го животот го снимил новинарот Наџибулах Курејши, се прикажани неколку области во источен Авганистан, кои се под контрола на Исламската држава последната година. Авганистанските власти сметаат дека бунтовниците на Исламската држава во моментов има околу илјада борци, и оваа бројка е во постојан пораст. Притоа, Исламската држава води постојани борби со разните фракции на радикалното движење Талибан, кое и натаму останува најмоќната групација со којашто се соочуваат авганистанските безбедносни сили.Во филмот се прикажани сцени од село коешто е под контрола на поранешниот талибански борец Абу Рашид кој му изразил верност на „калифатот“ на Исламската држава. Милитнатите им плаќаат на локалните мажи плата од 700 долари месечно, се женат со локалните девојки, собираат даноци и го контролираат она што се предава во училиштата.„Исламската држава користи различни начини да ги придобие малите деца да војуваат и да умираат за неа“, вели авторот на филмот. На часовите на момченцата и девојченцата постојано им се покажуваат автомати, гранати и пиштоли, потоа машките ги учат како да ракуваат со оружјето.На децата им објаснуваат дека треба да се убиваат „неверниците“, односно секој кој не ја поддржува идеологијата на Исламската држава. Исто така, на децата им прикажуваат снимки од егзекуции и терористички напади, кои според изјави на тамошните борци, тие ги добиваат директно од челниците на Исламската држава во Ирак и Сирија. Покрај тоа, децата ги учат со пропагандни видеа, на кои се прикажани кампови за обука, каде што децата ги казнуваат и ги обучуваат да ракуваат со оружје. Милитантите се согласиле да бидат интервјуирани во целосна опрема и оружје, принудувајќи ги децата во заднина да држат џихадистички знамиња на „калифатот“. Интервјуто е прекинато откако милитантите се посомневале дека областа може да е надлетувана од американско беспилотно летало. Рекле дека од јули годинава во американските бомбардирања загинале „стотици“ борци на Исламската држава.Во друга област на Авганистан, Курајши снимил две момчиња на 13 и 17 години, кои велат дека биле обучувани за да станат терористи самоубијци. На момчињата им се испушта дека биле обучувани од странци, но на повтореното прашање на новинарот не сакаат да одговорат. Според момињата, тие требало да активираат ткн „самоубиствени појаси“ или да искористат автомобил како бомба. Нивна цел требало да биде влијателен локален командант, кој почнал да соработува со владата на Авганистан.Филмот, исто така, го покажува и непријателството меѓу Исламската држава и талибаните. Обидувајќи се да ги зацврстат позициите и влијанието во Авганистан, борците на Исламската држава јавно ги егзекутираат заробените талибани. Авторот на филмот вклучува пропаганден видео материјал на Исламската држава, на којашто џихадистите креваат во воздух група авганистански племенски старешини кои се осомничени дека се симпатизери на талибаните.Во филмот се прикажани и припадници на авганистанска полициска племенска единица која е платена од владата, но набавува оружје од свои извори и се бори против талибаните и Исламската држава. Командантот на малубројната единица отворено му говори на новинарот дека се обидува да зароби талибани за да добие од нив информации.Во разговорот за телевизијата PBS, авторот на филмот Наџибулах Курејши вели дека снимајќи на териториите кои се под контрола на Исламската дражва се соочувал со постојана смртна закана. „Сето време мислев на мојата сопруга, на синовите… Не знаев дали ќе се вратам….“, вели Курејши./крај/мф/сн

Извор: Макфакс