Двајца Палестинци се убиени во саботата утрото во Западниот брег и во источен Ерусалим, територии кои меѓународната заедница ги смета за палестински окупирани од Израел, откако безуспешно се обиделе да со ножеви да избодат Израелци, објавија израелската полиција и војска.

Првиот напад се случил на Западниот брег, во близина на еврејската доселеничка населба во центарот на Хеброн, каде што 500 израелски доселеници живеат под заштита на војската. Палестинецот се обидел да избоде израелски доселеник со нож, кој го убил со истрели во самоодбрана и не е ранет, објави војската.

Палестинските сили за безбедност на Западниот брег ја потврдија смртта на напаѓач кој е идентификуван како 18-годишниот Фадел ал-Каватсми, пренесува AFP.

Непосредно по тоа, друг Палестинец е убиен откако се обидел да избоде израелски војник во квартот Армон Ханецив во источен Ерусалим, соопшти израелската полиција. Напаѓачот чиј идентитет не е познат, се обидел да избоде војник при контролирање на идентитетот и веднаш бил убиен од војниците, истакна портпаролката на полицијата Луба Самри.

Веќе две седмици траат секојдневните судири во Израел и на палестинските територии кои започнаа со убиството на доселеничка израелска брачна двојка во близина на градот Наблус на Западниот брег, поттикнато делумно од стравувањето на Палестинците дека Израел сака да го смени статусот на Платото на џамијата во источен Ерусалим – во Стариот град, каде што се наоѓа џамијата Ал Акса, едно од трите најсвети места на исламот. Ова локација е позната кај Евреите како Брдото на храмот, каде што се наоѓаат останки од древен хебрејски храм, и таму можат да одат но не и да се молат.

Во овие судири, кои се проширија и на палестинската енклава Појасот Газа, загинаа најмалку 6 Израелци и 27 Палестинци, од кои осум деца, според палестински болнички извори, и девет напаѓачи, според израелската полиција.

Главните политички палестински групи, како Фатах кој владее на Западниот брег и исламистичкиот Хамас кој ја контролира Газа, вторникот го прогласија за „Ден на гневот“ во Појасот Газа, источен Ерусалим и на Западниот брег, а челниците на израелските Арапи повикаа на протести.

Се стравува дека овие насилства претставуваат почетокот на третата палестинска интифада (востание).

Ситуацијата многу потсетува на онаа од септември 2000 година, кога избувна втората интифада, по првата од 1987 година, кога исто така владееја фрустрациите предизвикани кај двете страни од неуспешните мировни преговори. Непосреден повод за тоа, исто така, беше посетата на Ридот на храмот на тогашниот челник на израелската опозиција Ариел Шарон. Тоа свето место, кое е третото свето место во исламот, на кое се наоѓаат џамијата Ал Акса и Куполата на карпата, како и остатоците од древниот Ерусалимски храм, повторно е во центарот на збиднувањата.

Палестинците го обвинуваат Израел дека сака системски и дефинитивно да го промени статус-квото коешто се почитуваше со децении, според кој Евреите може да го посетуваат Ридот, но и таму да се молат. Израелскиот премиер Бенјамин Нетанјаху одлучно отфрли каква и да е намера тоа да го промени. Повиците на радикалните еврејски групации и партии да се дозволи молитва на Ридот, па дури и да се уништат двете џамии и повторно да се изгради Ерусалимскиот храм, според него, не ја одразуваат и политиката на владата./крај/мф/сн

Извор: Макфакс