Египќаните во неделата гласат во вториот и завршен круг од комплицираните избори, кои по тригодишен застој треба да го вратат парламентарниот живот во земјата којашто од ткн Априлска пролет во 2011 година постојано е потресувана од насилства и промени на властите.

Претседателот Абдел Фатах ал-Сиси ги поздрави изборите како пресвртница на патот на кој армијата ја поведе земјата во демократијата. Меѓутоа, во првиот круг од изборите во октомври одѕивот на гласачите беше многу низок – 21.71 отсто, а убедливо најмногу гласови добија кандидатите кои му се лојални на Сиси.

Оние коишто не излегоа на изборите тврдата дека немаат вистински избор, бидејќи исламистичкото движење Муслиманско братство, која е главната опозициска сила во земјата наспроти либералните исламски партии и секуларните, е исклучено откако беше прогласено за организација која поттикнува тероризам и насилство. Стотици нејзини челници, вклучително и поранешниот претседател Мохамед Морси, кого од должноста го отстрани токму Сиси, се во затвори и се осуден и на повеќекратни смртни или долгогодишни затворски казни по обвиненија од предавство, шпионажа па до поттикнување на убиства на демонстранти и припадници на безбедносните сили.

Египет последен пат го избираше парламентот во декември 2011 година, на првите избори по 30-годишното владеење на автократскиот претседател Хосни Мубарак кој беше соборен од власта во февруари истата година со масовните протести. Медиумите забележуваат дека тогаш во редови се чекаше пред избирачките места, младите беа одушевени, а Муслиманското братство освои повеќе од половината од пратеничките места.

Но во времето на Мохамед Морси, Судот го распушти парламентот кон средината на 2012 година, а една година подоцна Абдел Фатах ал-Сиси како претседател на влијателниот Врховен совет на вооружените сили на Египет му даде ултиматум на Морси да ги смири повеќемесечните улични безредија и протести со стотици мртви на опозицијата којашто го обвини дека како припадник на Муслиманското право ги узурпира овластувањата на судовите и оти во египетскиот устав внесува исламистички елементи. Неколку дена по ултиматумот Морси беше отстранет од должноста, откако ја загуби поддршката и од некои помали исламски партии, а приврзаниците на Муслиманското братство започнаа со постојани масовни протести, исто така, со стотици мртви.

Според Муслиманското братство во протестите кои траат од летото 2013 година досега се убиени повеќе од 1.400 негови приврзаници, претежно во главниот град Каиро, а повеќе од 15.000 членови или симпатизери на ова најстаро египетска исламистичка организација основана во 1930-те со тенденција да прерасне во сеарапско движење, се во затворите. Стотици, меѓу нив и Морси, се осудени на смрт на експедитивните и масовни процеси, кои беа критикувани од ОН.

По соборувањето на Морси и Муслиманското движење, Сиси вети дека армијата ќе го гарантира слободното и демократско одвивање на политичкиот процес во земјата. Меѓутоа, засилените терористички акции доведоа да се одржат само претседателските избори во 2014 година, на кои тој надмоќно победи, а парламентарните ќе бидат завршени до крајот на ноември 2015 година.

Новиот египетски парламент треба да има 568 пратеници, од кои 448 се избираат поединечно, 120 преку листи, а самиот претседател може да именува 28 пратеници. Но коментаторите тврдат дека речиси сите кандидати пријавени како независни му се лојални на Сиси, па парламентот ќе биде институција каде што само ќе се утврдуваат неговите одлуки.

„Од љубов кон Египет“ е лојалистичка коалиција која ја води поранешниот офицер на разузнавачка служба Самех Сиф Ељазал ги освои сите 60 места на листите во првиот круг и очекува дека во неделата ќе ги освои и преостанатите 60 места.

Критичарите велат и дека нема понуда, бидејќи листите на партиите на социјалистите и либералите, коишто требаше да понудат можност за вистински избор, се повлекоа оставајќи многу простор за приврзаниците на Сиси, кои се означуваат како личности од „времето на Мубарак“, високи покраински функционери и деловни луѓе./крај/мф/сн

Извор: Макфакс