Турција е решителна во тоа да учествува во планот на коалициските сили за ослободување на вториот по големина ирачки град Мосул од џихадистичката организација Исламска држави, и ќе го имплементира „планот Б“ доколку не биде вклучена, изјави во петокот турскиот претседател Реџеп Тајип Ердоган.
 
 

Турција е решителна во тоа да учествува во планот на коалициските сили за ослободување на вториот по големина ирачки град Мосул од џихадистичката организација Исламска држави, и ќе го имплементира „планот Б“ доколку не биде вклучена, изјави во петокот турскиот претседател Реџеп Тајип Ердоган.

Во својот говорот во градот Конја, претседателот Реџеп Тајип Ердоган рече дека Турција во следните денови на своите меѓународни партнери ќе им ја изрази желбата да учествува во операцијата за заземање на Мосул, но не откри што подразбира алтернативната стратегија.

Истовремено продолжува војната со изјави на релацијата меѓу Анкара и Багдад околу тоа кој треба да учествува во офанзивата врз Мосул, којашто според најавите со американска поддршка ќе започне во октомври.

Турција вели оти стравува дела учеството на шиитските милиции, на коишто ирачката војска се потпира, инаку шиитите сочинуваат околу 66 отсто од населението на Ирак, може да предизвика секташки судири, коишто инаку траат од соборувањето на режимот на сунитскиот диктатор Садам Хусеин, и оти ќе предизвика егзодус на беглаци.

„На коалициските сили ќе им го пренесеме нашето барање и решителноста да го заземе своето место во коалицијата во Ирак. Доколку не нé сакаат, на сила ќе стапи нашиот ‘план Б’. Доколку Турција не е сигурна, не е никој во регионот“, порача Ердоган.

Турските војници ги тренира сунистките муслимани и сојузничките курдски единици пешмерги во ирачката воена база Башика во близина на Мосул, и сакаат да учествуваат во нападот врз Мосул. Багдад, пак, е против турското воено присуство на ирачка територија во северниот дел од земјата и често тоа го нарекува „инвазија“ или „агресија“.

Ирачкиот премиер Хајдер ал-Абади изјави дека Турција ризикува започнување на регионална војна. Неговата влада побара итно заседание на Советот за безбедност на Обединетите нации за да се дискутира за оваа тема, а двете земји ги повлекоа своите амбасадори.

„Нé повикавте во Башика, а сега ни велите да си заминеме. Простете, но јас таму имам роднини, јас таму имам туркменски и турски браќа кои нé замилија да дојдеме и да помогнеме“, истакна Ердоган, додавајќи дека му е „жал, но оти нема да заминат“.

Турција распореди тенковски баталјон ланскиот декември, со околу 180 војници и 25 тенкови и оклопни возила во базата Башика, каде што тврди дека ги обучува силите на ирачките Курди за борба против Исламската држава. Меѓутоа, официјален Багдад, како и другите сојузнички држави, предупредија дека чекорот на Анкара е без договор и дозвола на ирачката влада, и оти претставува нарушување на интегритетот на соседната земја.

Турската државна агенција Anadolu претходно седмицава објави дека воените единици кои ги обучувала Турција во Башика ќе бидат дел од планираниот напад врз Мосул, цитирајќи функционери за кои наведе дека се вклучени во преговорите со САД, како и извори во Ирак.

Се очекува дека операцијата за ослободување на градот со 1,5 милиони жители кој од 2014 година е под контрола и е центар на самопрогласениот калифат на Исламската држава, ќе започне следните денови „доколку нема некои вонредни околности“./крај/мф/сн

Извор: Reuters