Адвокатот на семејството на 18-годишниот афроамерикански тинејџер Мајкл Браун кој во август беше убиен од 28-годишниот бел полицаец Дарен Вилсон, предупреди во вторникот на неправедната одлука на големата порота судски да не го гони полицаецот кој пукал во невооруженото момче.
 

Адвокатот на семејството на 18-годишниот афроамерикански тинејџер Мајкл Браун кој во август беше убиен од 28-годишниот бел полицаец Дарен Вилсон, предупреди во вторникот на неправедната одлука на големата порота судски да не го гони полицаецот кој пукал во невооруженото момче.

„Се уверивме до која мера таа одлука е неправедна. Отворено и силно протестираме во името на Мајкл Браун“, изјави Бенџамин Крамп на прес-конференција по повод ослободувањето од вината на полицаецот Дарен Вилсон.

„Стануваме против таа одлука, бидејќи во цела Америка, без разлика дали тоа е Њујорк, Лос Анџелес, во Калифорнија или во Кливленд, младите момчиња со друга боја на кожата ги убиваат полицајци“, додаде адвокатот на семејството Браун.

По тримесечно заседание, обвинителот на округот Сент Луис, Роберт Меккалох извести дека полицаецот нема да биде судски гонет, откако големата порота, којашто ја сочинуваат дванаесет лица од кои девет белци и тројца црнци, ја прифати верзијата на полицаецот според којашто пукал откако во возилото тинејџерот се обидел да му го одземе пиштолот и настанало борење. Сведоци, пак, изјавија дека црномурестото момче било убиено надвор од полициското возило и додека стоело со рацете кренати во воздух во знак на предавање, а обдукцијата покажа дека во него било пукано шест пати.

Семејството на Мајкл Браун издаде соопштение во кое истакна дека е „длабоко разочарано“ што полицаецот Дарен Вилсон нема да биде судски гонет. Сепак, и тие како и претходно американскиот претседател Барак Обама, изјавија дека апелираат протестите поради одлуката на големата порота да бидат мирни.

Протестите, коишто во местото Фергусон, предградие на Сент Луис со 20 илјади жители од кои големо мнозинство се афроамериканци, прераснаа во безредија, како и во уште неколку американски градови по објавувањето на одлуката.

По ноќта исполнета со насилства, протестите беа продолжени и во вторникот, а бранот огорченост поради „расизмот кој убива“ ги зафати и Њујорк, Чикаго, Сиетл, Лос Анџелес, Окленд и главниот град Вашингтон, што според американските аналитичари говори дека долготрајната расна напнатост не е особеност само на Фергусон, туку е присутна ширум САД.

Новите протести се одржаа и покрај повиците на смиреност на највисоките американски функционери, како и дополнителното испраќање од страна на гувернерот на сојузната држава Мисури, Џеј Никсон, на единици на Националната гарда на САД во Фергусон, иако претпоставувајќи го можниот расплет на настаните уште во понеделникот распореди бројни сили на гардата.

„Севкупно, во областа ќе бидат распоредени 2.200 војници на Националната гарда. Тоа е неопходно за да се заштитат животите и имотите на граѓаните“, изјави за медиумите гувернерот Никсон, откако изминатата ноќ, безредијата завршија со уништување, потпалувања и ограбувања на продавници и автомобили, како и со 14 повреден од кои двајца со рани од огнено оружје и 29 приведени./крај/мф/сн

Извор: AFP