Вести
Француски авиони трагаат по АХ5017 на „Ер Алжир“

Летот АХ5017 на компанијата „Ер Алжир“ на кој патувале 110 патници и шест члена на екипажот во четвртокот исчезна од радарите по само 50 минути од неговото полетување од Буркина Фасо.
CCTV објави дека леталото се урнало и дека сите патници и членови на екипажот загинале во несреќата, но ваквите информации официјално не се потврдени.
Руската новинска агенција Риа Новости, повикувајќи се на извештај на алжирската телевизија Ал – Нахар, наведува дека авионот паднал во близина на престолнината на Нигер, Нијамеја, и „дека се претпоставува оти сите патници загинале“.
Меѓутоа, можеби дошло до грешка во извештајот за време на неговото пренесување, бидејќи тоа би значело драстично скршнување од курсот на летот и дека АХ5017 веднаш ја променил насоката кон исток.
Според достапните информации, пилотот на авионот рано утрото околу еден часот и 38 минути побарал промена на курсот поради слабата видливост, силната бура, како и близината на друг патнички авион во близина на границата на Мали со Алжир, по што се изгубил контактот со леталото.
Поради ваквиот сплет на околности, најверојатно во извештајот за наводниот пад на авионот се мислело на реката Нигер, која тече на територијата на Мали.
Француското министерство за сообраќај соопштило дека на летот најверојатно имало многу патници од Франција, поради што во Париз е воспоставен кризен штаб, а два француски воени авиона тргнале во потрага по исчезнатото летало.
Според некои извештаи, на летот АХ5017 имало најмалку 50 француски државјани.
По исчезнувањето на леталото, алжирската национална компанија „Ер Алжир“ соопштила дека е „воспоставен итен протокол“ и дека штом дојде до информации ќе ја извести јавноста за деталите.
Според информациите станува збор за авион „Мекдонел Даглас МД – 83“ сопственост на шпанската компанија „Свифтер“, кој сообраќал на чартер лет од Буркина Фасо до Алжир со кој раководела компанијата „Ер Алжир“.
„Свифтер“ соопштил дека нема никаков контакт со леталото.
„Навигационите служби го изгубија контактот со авионот на „Ер Алжир“ кој леташе од Уагадугу во Алжир, 50 минути после неговото полетување“, соопштила алжирската авиокомпанија, пренесе алжирската новинска агенција APS.
Како што пренесе AFP претставници од Буркина Фасо соопштиле дека пилотот на авионот во близина на границата со Алжир побарал промена на курсот поради слабата видливост и поради близината на друг патнички авион кој летал на линијата Алжир – Бамако.
Британскиот „Sky“ наведува дека не е познато дали авионот навистина го променил курсот и додава дека во Мали се водат вооружени судири, но дека не постои веројатност авионот да е урнат.
Некои алжирски медиуми тврдат дека авионот паднал откако го потрошил горивото, како и дека во текот на денот биле забележани големи бури во тој регион.
Од Уагадугу до Алжир постои редовна линија на „Ер Алжир“ и овој лет се повторува четири пати во неделата.
„Свифтер“ е приватна компанија која е специјализирана за чартер летови, а во својата флота поседува повеќе од 30 летала, меѓу кои се моделите „боинг 727“ и „боинг 737“, МД83 и АТР 72.
Ова е трет инцидент со патнички авион во последниве седум дена, по соборувањето на малезискиот МХ17 во источна Украина, како и падот на локалниот авион на „Трансазија“ на летот ГЕ222 во Тајван.
Во Алжир во февруари се случи најголемата авионска несреќа во историјата на оваа земја кога при пад на воен авион настрадаа 77 лица./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Вести
“Во основа е пекол на земјата”: Градот Газа оставен тотално без здравствената заштита

Во раните утрински часови во саботата, над купови бетон и урнатини, толпа лекари и пациенти пешачеа километри низ уништените улици на градот Газа, принудени да се евакуираат пеш од она што остана од болниците. Здравствените работници велат дека се плашат да ги оставаат критично болните пациенти зад себе во град кој сега во голема мера е сведен на урнатини, преземен израелските сили, со болници кои работат без струја, гориво, вода или храна, пишува британски „Гардијан“.
“Тоа е во основа пекол на земјата”, вели Вилијам Шомбург, шефот на Меѓународниот комитет на Црвениот крст во Газа, опишувајќи го она што остана од животот во градот.
Со недели, десетици илјади луѓе се надеваа дека во болниците во Газа ќе најдат засолниште кое е најблиску до безбедно бидејќи енклавата издржа интензивирачки бомбардирања.
Но, откако израелските сили се приближија до објектите и потоа ја нападнаа најголемата болница во Газа, Дар ал-Шифа минатата недела, илјадници луѓе беа раселени заедно со медицинскиот персонал, шетајќи низ уништените улици на југ од енклавата.
Палестинското министерство за здравство во Газа соопшти дека израелските сили побарале евакуација на болницата Ал Шифа вчераутро, три дена откога влегоа во објектот. Здравствените лица сведочат дека им им било кажано дека имаат еден час да ја евакуираат болницата која беше центар на здравствениот систем на Газа.
Најмалку 12.000 луѓе загинаа во израелскиот напад врз Газа по нападот на Хамас на 7-ми октомври, во кој загинаа 1.200 Израелци, а околу 240 луѓе беа заложници.
Вести
Борел: Целосно е невозможно да се евакуираат милиони луѓе од северот на Газа

Првиот човек на ЕУ-дипломатијата Жозеп Борел утринава на прес-конференција изјави дека евакуацијата на милиони луѓе од северниот дел на Газа е целосно невозможна.
Десетици илјади цивили почнаа да бегаат од јужниот дел на Газа вчера, откако Израел им порача на луѓето да ја напуштат областа пред очекуваната копнена офанзива.
„Да се замисли дека можеш да преселиш милион луѓе за 24 часа во ситуација во каква што е Газа, може да биде само хуманитарна криза“, рече Борел на последниот ден од тридневната дипломатска посета на Кина.
И покрај изјавата на ЕУ за поддршка на Израел, тој исто така предупреди дека и Израел е должен да го почитува меѓународното хуманитарно право во одбранбениот процес.
„Позицијата е јасна“, рече Борел. „Но, како и секое право, тоа има граница. А таа граница е меѓународното право“.
Вести
Проценки на ОН: Десетици илјади луѓе веќе ја напуштија Газа

Во текот на ноќта беа објавени најновите проценки на ОН за бројот на луѓе кои ги напуштиле своите домови во северниот дел на Газа.
Тие велат дека веруваат дека станува збор за десетици илјади кои се упатиле кон југ по предупредувањето за евакуација на Израел.
Пред наредбата за евакуација, повеќе од 400.000 Палестинци беа внатрешно раселени, според хуманитарната канцеларија на ОН OCHA.
Израелската војска им порача на околу 1,1 милион луѓе во северниот дел на Газа да заминат пред очекуваната копнена инвазија. Хамас, пак, ги повика луѓето да останат на место и да пркосат на израелската воена наредба.
Генералниот секретар на ОН, Антонио Гутереш рече дека наредбата од Хамас е „исклучително опасна – и во некои случаи едноставно не е возможна“.