Руските безбедносни служби сметаат дека заканата за земјата од Исламската држава е реална, бидејќи во нејзините редови се борат околу 1.700 руски државјани, а некои од бунтовничките водачи од северен Кавказ ѝ изразиле лојалност на оваа џихадистичка терористичка организација, изјави во петокот заменикот на руската ФСБ, Сергеј Смирнов на состанокот на челниците на безбедносните служби од регионот во узбекистанската престолнина Ташкент.

Руската Федерална служба за безбедност (ФСБ) располага со прелиминарни податоци дека на страната на милитантите се борат околу 1.700 руски државјани и околу 300 државјани на соседен Таџикистан, изјави на прес-конференцијата во Ташкент, Смирнов на средбата на челниците на разузнавачките и антитерористички служби на земјите од ШОС.

Станува збор за асоцијацијата Шангајска организација за соработка (ШОС), основана во 2001 година, а чии почетоците датираат од 1996 година, и во која влегуваат Кина, Русија и поранешните советски републики Казахстан, Таџикистан, Киргизија и Узбекистан.

„Сосема сме свесни за присуството на државјани од земјите членки на ШОС во редовите на Исламската држава. Според нашите податоци, во редовите на бунтовниците би можело да се околу 1.700 државјани на Руската Федерација, а имаме информација и за 300 државјани на Таџикистан. Ова се бројки, за кои само знаеме“, рече заменикот челник на руското ФСБ:

Според руските служби, опасноста од ширењето на џихадистите на територијата е оценета како „апсолутно реална“, особено откако некои водачи на исламистичките бунтовници кои на Северен Кавказ прогласија ткн „кавкаски емират“ искажале лојалност на Исламската држава.

„Заканата од Исламската држава се согледува во тоа што тие започнуваат да се инфилтрираат во другите злосторнички организации како ‘Емиратот Кавказ’. Некои од бунтовничките команданти се заколнаа на верноста на Исламската држава“, тврди Смирнов.

Ткн „Емират Кавказ“ во 2012 година на рускиот Кавказ го прогласија исламистите кои дејствуваат во нестабилните републики, Чеченија, Дагестан, Ингушетија. И покрај многуте акции за нивно неутрализирање, регионалните власти нагласуваат дека „бунтовниците и натаму привлекуваат нови членови”.

Оценува дека станува збор за опасен тренд, бидејќи џихадистичката групација очигледно ја проширува зоната на своите интереси и врз постосоветскиот простор.

„Треба да развиваме заеднички активности за неутрализирање на оваа закана. На билатерално ниво со Узбекистан такви активности веќе преземаме, формирана е заедничка рупа којашто постојано работи во оваа насока“, информира Смирнов.

За новинарите истакнал дека на состанокот во Ташкент било дискутирано за мерки кои би се преземале против Исламската држава. Станува збор за разузнавачки активности, размена на оперативни податоци во реално време за податоците и движењето на осомничените, појаснил Смирнов. Иако, како што нагласил, размена на информации веќе има на билатерално ниво, како и во рамките на Организацијата.

„Вознемиреноста се јавува од тоа што присуството на Исламската држава на нашите граници е реално“, порачува Смирнов./крај/мф/сн

Извор: РИА Новости