Германското министерство за надворешни работи објави во петокот дека Тајланд би можел да биде погоден од нови напади по серијата експлозии во три летувалишта во оваа земја и им советуваат на германските туристи за кои инаку Тајланд е омилена дестинација „извонредна претпазливост“.

Четворица луѓе се убиени, а повеќе десетици се ранети во експлозиите во трите популарни летувалишта на Тајланд во четвртокот ноќта и петокот утрото.

„Нови напади се можни. Министерството за надворешни работи затоа советува извонредна претпазливост. На луѓето коишто патуваат во Тајланд им се препорачува да ги избегнуваат јавните места и гужвите, и да ги следат медиумските извештаи“, соопшти германската дипломатија објавувајќи совети за патување.

Министерството за надворешни работи, исто така, потврди дека тројца Германци се повредени во споменатите напади. Медиумите јавуваат дека меѓу повредените се неколку Холанѓани, Италијанци и Австријци.

Тајландските власти потврдија дека имале разузнавачки податоци за можни напади, но не и прецизни информации за тоа каде и кога би можеле да се случат, објави во петокот челникот на тајландската полиција. Потврди дека во експлозијата има четворица мртви и 32 ранети.

Бомбите експлодираа во популарните туристички дестинации, две жртви има во Хуа Хин, и по една во Сурат Тани и во Транг. Вкупно се регистрирани 11 експлозии во пет провинции на југот од Тајланд, вклучително и омилениот за туристите остров Пукер, а власите од петокот утрото ги засилија безбедносните мерки.

Експлозиите се случија во периодот кога мноштво туристи се упатуваат во Хуа Хин на продолжениот викенд поради прославата на роденденот на тајландската кралица Сририкит, кој на Тајланд се прославува и како Денот на мајката.

Засега ниедна група не ја презема одговорноста, но сомневањето паѓа на локалните сепаратистички бунтовници. Тајландската полиција, исто така, соопшти дека експлозиите немаат врска со меѓународниот тероризам, туку се дело на локалните бунтовници.

Шефот на тајландската хунта, Прајат Чан-О-Ча во петокот изјави дека нападите се обид да се предизвикаат немири в земјата којашто е разорена од децениската политичка криза.

„Бомбашките напади се обид да се предизвика хаос и конфузија.“, рече Прајат за новинарите во Бангкок додавајќи дека експлозиите доаѓаат во време кога ситуацијата во земјата се стабилизира и закрепнуваат економијата и туристичкиот сектор.

Овие напади доаѓаат точна една година откако минатиот август во експлозијата во центарот на Бангкок загинаа 20 луѓе, главно туристи од Кина, во најкрвавиот напад од овој вид кој го погодил Тајланд последните години.

Локалните медиум, исто така, истакнуваат дека сегашните експлозии се случуваат во време кога избирачите на референдум со големо мнозинство го одобрија нацрт-уставот на Тајланд кој го предложи хунтата кој треба да биде основа за воспоставување цивилна влада под влијание на војската. Референдумот го отвора патот за одржување на општите избори следната 2017 година, но бара од идните влади да ја регулираат улогата на војската.

Воената хунта којашто дојде на власт во 2014 година, го укина претходниот устав и формира комисија којашто го подготвува новиот. Меѓутоа, големите партии на Тајланд го отфрлија новиот устав, велејќи дека тој е недемократски и ќе ја потврди само воената контрола над општеството.

Современата историја на Тајланд е одбележана со постојана нестабилност и длабоки политички поделби. Изминатата деценија на власт се менуваа ројалистичката армија и нејзините сојузници од естаблишментот, од една страна, и од друга од избрани влади предводени или поврзан со милијардерот Таксин Шинаватра кој живее во самоизбран егзил во странство./крај/мф/сн

Извор: Макфакс