Иранскиот врховен водач, ајатолахот Али Хамнеи ги обвини во понеделникот САД и владата на Велика Британија дека придонеле за подемот на Исламската држава (IS) во својот прв говор по операцијата на простатата на којашто беше подвргнат во септември.

Острите забелешки на ајатолахот Хамнеи потсетија дека Иран сѐ уште е сомничав кон Западот и покрај појавата на ултрарадикалните сунитски џихадисти во Ирак и во Сирија, заедничкиот непријател и на Вашингтон и на Техеран, кои инаку меѓусебно негуваат непријателски однос повеќе од деценија.„Америка, ционизмот и особено стариот стручњак во предизвикувањето поделби, злата британска влада, силно ги засилија напорите да создадат поделба меѓу сунитите и шиитите“, изјави Хамнеи во говорот по повод празникот на шиитските муслимани.„Внимателниот и аналитички поглед на случувањата укажува дека САД и нивните сојузниците, во напорите кои лажно се претставуваат како борба против џихадистите, сакаат да се создаде поделба и непријателство меѓу муслиманите, а не да се уништи коренот на она што е причината за појавата на терористите сега“, рече Хамнеи. Исламската држава се појави на боиштето во Сирија во 2013 година и во почетокот се бореше заедно со опозициските сунитски групации кои ја имаат поддршката на Западот и другите сунитски арапски земји од регионот вклучително и Турција, против силите на претседателот Башар ал-Асад кој потекнува од алавитската (шиитска) малцинска заедница, а ја има поддршката на Иран. Џихадистите од споменатата радикална групација во 2014 година започнаа да дејствуваат и во Ирак користејќи го чувството на запоставеност на тамошните сунити од страна на централната влада која ја водат мнозинските шиити. Исламската држава во двете соседни земји освои значајни територии на кои во јуни годинава прогласи „исламски калифат“ и брутално се справува со припадниците на шиитската заедница, како и со другите етнички групи како Курдите, кои ги смета за неверници.„Шиитите и сунитите мора да знаат дека секоја акција или забелешка, вклучително и меѓусебните навреди, водат до зголемување на чувствителноста и распалување на огнот. Тоа секако ќе биде во полза на заедничкиот непријател на сите муслимани“, порача врховниот духовен водач на Иран, пренесува телевизијата Press TV.И покрај долгото непријателство, и шиитската регионална сила Иран и САД се противници на сунитските радикали, и ги вооружуваат локалните групи кои се борат против Исламската држава. Техеран, дури, изрази подготвеност да интервенира воено во спречувањето северниот сириски курдски град Кобане да падне во рацете на џихадистите. Сепак, високи функционери на двете земји исклучуваат какви и да се планови за заеднички воен ангажман против сунитските екстремисти.„Тие ги создадоа Ал Каеда и Исламската држава за да предизвикаат поделби и да се борат против Иран, а сега се свртија против нив“, истакна ајатолахот Хамнеи.САД заедно со петте арапски сунитски монархии од 23-ти септември го започна воздушните напади врз Исламската држава на територијата на Сирија, а претходно од јуни изведува такви удари врз позициите на џихадистите во Ирак. И другите западни земји, вклучително и Велика Британија, учествуваат во воздушните напади во Ирак./крај/мф/сн

Извор: Макфакс