Иранската политика кон „арогантните“ Соединети држави нема да се промени и покрај постигнувањето на нуклеарниот договор меѓу Техеран и шесте светски сили, изјави во саботата врховниот верски водач и авторитет на Иран, ајатолахот Ал Хамнеи додавајќи дека Техеран и натаму се спротиставуваат на политиката што ја водат САД на Блискиот исток и повтори дека Иран според учењето на Куранот никогаш немал намера да произведе нуклеарно оружје.

Во своето обраќање по повод одбележувањето на завршувањето на светиот муслимански месец Рамазан, ајатолахот Али Хамнеи изјави дека сака политичарите да го проучат добро нуклеарниот договор за да се осигури зачувувањето на националните интереси, бидејќи Иран нема да дозволи укинување на своите револуционерни принципи или одбранбените способности.

„Без разлика дали (нуклеарниот) договорот ќе биде прифатен или отфрлен, ние никогаш нема да престанеме да ги поддржуваме нашите пријатели во регионот и народите на Палестина, Јемен, Сирија, Ирак, Бахреин и Либан. Дури и по постигнувањето на овој договор, нашата политика кон арогантните САД нема да се промени“, рече Хамнеи.

„Во услови кога е создадена атмосфера на закани од непријателот, колку и да постои загриженост за заштитата на своите способности за одбрана и безбедност, Исламската Република никогаш нема да се поклони пред претераните барања на непријателот“, изјави иранскиот ајатолах на проповедта по масовната молитва во Техеран во саботата со која се одбележува крајот на светиот месец на постот Рамазан и рамазанскиот Бајрам (Еид ал-Фитр).

„Со Божја волја, одбранбените капацитети на земјата и личната безбедност ќе бидат заштитени. Никому нема да биде дозволено да им наштети на интересите на Иран“, порача Хамнеи.

Според ајатолахот, извикувањето на паролите „Смрт на Америка“ и „Смрт на Израел“ на протестите во Иран изминатата седмица, одржани во знак на поддршка на Палестинците, покажало што Иранците мислат.

„Повторно рековме дека не преговараме со САД за регионалните или меѓународните прашања, дури ниту за билатералните прашања. Има некои исклучоци, како што е нуклеарната програма за кои преговаравме со Американците во наш интерес… Американската политика во регионот е дијаметрално спротивна на иранската политика“, рече Хамнеи, според прилогот на Press TV.

Ги критикуваше ставовите на Вашингтон за обвинување на шиитското либанско движење Хезболах за тероризам, додека ги поддржуваат „ционистичкиот терористички израелски режим“.

Одговарајќи на изјавите на американските политичари дека со договорот од Виена успеале да го спречат Иран да дојде до нуклеарно оружје, ајатолахот Хамнеи во говорот пренесуван на иранските телевизии истакна дека врз основа на учењето на муслиманската света книга Куранот, производството и складирањето на оружје за масовно уништување како што е нуклеарното е забрането. За големиот ангажманот, пак, на американската администрација на нуклеарните преговори рече дека станува збор за „внатрешни проблеми на САД“.

Им порача дека американските политичари „треба да сфатат“ оти никогаш „нема да се оствари нивниот сон“ иранскиот народ да се предаде, како и дека со однесувањето кон Иран прават „голема грешка“ кога станува збор за регионалните прашања. „Треба да се разбудат и да го сфатат тој факт“, рече ајатолахот Хамнеи.

Коментирајќи го говорот на Ханеи, агенцијата Reuters наведува дека постигнувањето на нуклеарниот договор меѓу Иран и шесте светски сили, САД, Русија, Кина,м Велика Британија, Франција и Германија, со посредство на ЕУ, претставува триумф за умерениот ирански претседател Хасан Роухани.

Се истакнува дека иако ајатолахот Хамнеи има решавачка одлука кога станува збор за безбедносните прашања, иранскиот претседател има важна улога во носењето на одлуките во оваа шиитска земја со речи 80 милиони жители, со што овозможи промени во однос на конфликтниот стил на поранешниот претседател Махмуд Амадинеџад.

Роухани, кој е избран за претседател со големо мнозинство од гласовите пред речиси две години, поранешен главен преговарач за иранската нуклеарна програма, познат по својот мирољубив пристап. Во кампањата тој најави дека ќе се залага за надворешна политика која ќе се темели на „конструктивната интеракција со светот“ и ќе ги заштитува граѓанските права на домашен терен.

Роухани во средата изјави дека нуклеарниот договор меѓу Иран и светските сили претставува политичка победа за Исламската Република додавајќи дека договорот значи дека Техеран повеќе нема да се смета за меѓународна закана. „Никој не може да каже дека Иран се предал. Договорот е правана, техничка и политичка победа на Иран. Големо е достигнување што Иран повеќе нема да се нарекува светска закана“, изјави Роухани.

Иранците на улиците на големите градови го славеа историскиот нуклеарен договор надевајќи се дека ќе завршат економските санкции кои повеќе од деценија предизвикуваат штети на иранската економија./крај/мф/сн

Извор: Макфакс