Кандидатката на Демократската партија за ноемврискиот претседателски избори во САД, Хилари Клинтон во петокот ги објави приходите заедно со нејзиниот сопруг поранешниот американски претседател Бил Клинтон за минатата 2015 година кои покажуваат заработка од 10,6 милиони долари и го критикуваат републиканскиот противкандидат Доналд Трамп кој смета дека е доволно да ја запознае со таквите податоци изборната комисија.,

Брачната двојка Клинтон пријавила 10,6 милиони долари приходи за 2015 година,. Платиле 3,6 милиони долари сојузен данок, според документите објавени на онлајн страницата на Хилари Клинтон. Во текот на нивните политички кариери, Клинтонови од 1977 година го објавиле сите свои приходи од 1977 година, што е податок што демократите често го истакнуваат.

Главните извори на приходи за семејството Клинтон се платените предавања на Бил Клинтон од кои само во 2015 година заработил 5,2 милиони долари, како и заработката од последната книга на Хилари Клинтон за која издавачот „Simon & Shuster“ исплатил 3 милиони долари. Клинтонови подариле милион долари на хуманитарната фондација којашто го носи нивното име.

Меѓутоа, нема одговор на истрагата од мај на американското Федерално биро за истраги (FBI) која открила дека сопружниците Бил и Хилари Клинтон земале повеќе од 100 милиони долари од блискоисточни лидери.

Истрагата на новинската фондација Daily Caller открила вознемирувачки урнек според кој фондацијата „Клинтон“ влечела пари од режими кои имаат, благо речено, спорно досие на почитување на човековите права и кои не секогаш работат во интересите на САД. Згора на сé, споменатите 100 милиони долари не ги вклучуваат 30-те милиони долари добиени од две фондации со седиште на Блискиот исток и од четворица саудиски милијардери.

„Овие режими си купуваат пристап“, рече тогаш Патрик Пул, аналитичар на националната безбедност. „Тука ги имате Саудијците. Потоа ги имате Кувајќаните, па Оман и ОАЕ (Обединети арапски емирати). Тоа е масивен судир на интереси. Тоа е надвор од разумот.“

Во меѓувреме, поранешниот Главен обвинител на САД, Џозеф Е. Диџенова за Daily Caller изјави дека верува оти FBI има покренато и втора, можеби и уште посериозна истрага, за можна политичка корупција во која била вклучена и фондацијата „Клинтон“. Ова има потенцијал да стане исклучително експлозивно, со оглед на тоа дека се чини оти Клинтонови фондацијата ја користеле претежно за да си ги наполнат сопствените џепови.

Прашањето што го постави тогаш истражувачкиот новинарски конзорциум беше дали блискоисточните земји, богати со нафта, обемно ја дарувале фондацијата „Клинтон“ во обид да извршат влијание врз идната надворешна политика на САД? Исто така, под лупа беше ставено и деловното партнерство на Бил Клинтон со шеикот Мохамед бин Рашид ал-Мактум, авторитарниот владетел на Дубаи, кое траело од 2003 до 2008 година. Клинтон (Бил) во тој период зел 15 милиони долари во „загарантирани исплати“, како што покажале досиејата за тој настан.

Само во последните три години, веднаш по завршувањето на нејзиниот мандат како прв дипломат на САД, Хилари Клинтон одржала говори во 12-ина фирми од Волстрит (со многу длабоки џебови), при што вообичаено наплаќала по 250.000 долари. Сé на сé, таа наплатила вкупно околу 22 милиона долари од овие настапи.

Тим Кејн, кандидат на демократите за потпретседател ги објави своите приходи за последните десет години. Овој сенатор од сојузната држава Вирџинија заедно со сопругата Ен Холтон во 2015 година платил 20,3 отсто сојузни даноци.

Републиканските и демократските кандидати во последните девет претседателски кампањи, по Роналд Реган во 1980 година, редовно ги објавуваа своите приходи. Меѓутоа, Доналд Трамп одбива тоа да го стори и тврди дека тоа не му го овозможува фискалната контрола. Истакна дека на изборната комисија FEC во мај ѝ ја предал документацијата за својата финансиска транспарентност, која смета дека е доволна.

Меѓутоа, критичарите на Трамп, вклучително и неуспешниот републикански претседателски кандидат од 2012 година Мит Ромни, истакнуваат дека одбивањето на Трамп да ги објави во медиумите приходите и даноците поставуваат низа прашања за остварената нето добивка, за неговото работење и деловни врски, наводно и такви со Русија, пишува агенцијата Reuters.

На почетокот од август во интервјуто за телевизијата ABC на обвинувањата дека Трамп ја добива помошта од рускиот претседател Владимир Путин, со кого според Обама и демократската кандидатка Хилари Клинтон си разменуваат пофалби а непријатните хакирања и протекувања на писма им ги припишуваат на руските тајни служби како поддршка на републиканскиот кандидат, милијардерот рече дека со Русија немал никакви ниту деловни односи и оти не се познава со рускиот челник.

„Немам никакви односи со Путин, никогаш не сум се сретнал со него“, рече Трамп и додаде „Доколку нашата земја би можела да соработува со Русија, тоа би било многу убаво“.

Трамп негативно одговори на прашањето дали имал инвестиции или долгови во Русија. Притоа потсети дека пред околу пет години купил имот на Палм Бич, на Флорида за 40 милиони долари, и му го продал на Русин за 100 милиони долари. Но не го откри името на купувачот.

„Дали ќе му продадам куќа на Русин, доколку имам можност? Можеби. Јас се занимавам со тоа, имам многу имоти. Но немам никакви блиски врски со Русија“, истакна републиканскиот претседателски кандидат./крај/мф/сн

Извор: Макфакс