Главниот обвинител на Индонезија застана во средата во одбрана на извршувањето на смртните пресуди на осумте странски државјани поради криумчарење дроги, изјавувајќи дека неговата земја води војна против дрогата.

„Водиме војна против страшните злосторства поврзани со дрогите, коишто му се закануваат на преживувањето на нашата нација“, изјави обвинителот Мухамад Прасетио на прес-конференцијата од во Силакапа, пристанишен град од каде може да се дојде до островот Нусакамбанган каде што се наоѓа строго чуваниот затвор во кој се држат лицата осудени на смрт и се извршуваат егзекуциите.

Ноќта кон средата по локално време беа стрелани биле двајца Австралијци, четворица Нигеријци, како и државјани на Бразил и Индонезија., и покрај многубројните апели за помилување од меѓународната заедница и од семејствата на осудениците.

Младата филипинска мајка, којашто исто така требаше да биде погубена поради кримчарење на дроги, буквално во последните секунди добила одложување на извршувањето на пресудата. „Мама ќе живее!“, извикувале нејзините деца, синови на 6 и 12 години, а поборниците за нејзиното помилување плачеле од среќа, пренесуваат агенциите.

Кога во средата сабајлето беше објавено дека 30-годишната Мари Џејн Велосо не е погубена како што беше најавено, нејзиното семејство изјави дека смета оти нивните молитви биле слушнати. Оваа самохрана мајка беше уапсена пред пет години на централниот индонезиски остров Јава со 2,6 килограми хероин во нејзиниот багаж.

Филипинските челници веднаш има изразија благодарност на своите индонезиски колеги, особено на претседателот Џоко Видодо.

На листата за егзекутирање беше и 51-годишниот Французин Серж Атлауи, но во последен момент беше тргнат од списокот за погубување, бидејќи неговиот адвокат вложил жалба и неговиот процес не е завршен. Портпаролот на обвинителството на Индонезија, Тони Спонтаната, претходно во вторникот потврди дека доколку биде потврдена пресудата, властите нема долго да чекаат за нејзино извршување.

„Би сакал да истакнам дека погубувањето не е пријатна задача, но мораме да ја извршиме за да ја спасиме нацијата од опасноста од дрогите. Не правиме непријатели од земјите од каде што потекнуваат погубените. Се бориме против злосторствата поврзани со дрогите“, изјави обвинителот Прасетио.

Австралија по стрелањето на своите двајца државјани го повлече амбасадорот од Индонезија. Главниот индонезиски обвинител ја минимизираше одлуката на Австралија да го отповика својот амбасадор, оценувајќи дека станува збор за „привремена акција“.

Министерствата за надворешни работи на Бразил и Нигерија објавија во соопштение во кои ги осудија егзекуциите. Во јануари годинава, по егзекуцијата на пет странски државјани, веднаш потоа Бразил го отповика својот амбасадор во Џакарта, по што и индонезискиот дипломат беше принуден да ја напушти јужноамериканската земја.

Меѓународната организација за човекови права Amnesty International ги осуди во средата погубувањата.

Медиумите пренесуваат дека осудениците добиле превези преку очите пред стрелачкиот вод и заедно ја пееле „Чудесна милост“ во моментот на погубувањето коешто било извршено малку по полноќ по локално време, односно во вторник по 18 часот по средноевропско време, според свештеникот кој присуствувал на извршувањето на смртната казна. Погубени се „истата секунда, истата минута“, изјавил пасторот Карина де Вега. Потоа нивните тела биле измиени и положени во сандаци.

Во моментов во затворите во Индонезија има 135 осуденици на смрт, од кои најголемиот дел се за криминални активности поврзани со дроги, а 60 од нив се странци. Борбата со зависностите од дроги индонезиските власти ја прогласија за еден од националните приоритети. Според официјалните процени, бројот на индонезиските граѓани кои користат дроги во 2015 година ќе достигне 5,8 милиони. Секој ден во земјата од дроги умираат околу 50 лица, а бројот на лицата кои не се евидентирани и не биле никогаш на третман за рехабилитација се проценува на 1,2 милиони луѓе во оваа речиси 250 милионска нација./крај/мф/сн

Извор: Макфакс