Ирачкиот претседател Фуад Масум во понеделникот попладне му го даде мандатот на Хајдер ал-Абади да ја состави новата влада, на што веројатно жестоко ќе се спротистави досегашниот премиер Нури ал-Малики зад кого стои најголемиот поединечен парламентарен блок, особено откако претходно во понеделникот ирачкиот Уставен суд одлучи дека Масум мора нему да му го довери мандатот, откако за тоа измина законскиот рок, бидејќи парламентарните избори се одржаа уште во април.
 

Ирачкиот претседател Фуад Масум во понеделникот попладне му го даде мандатот на Хајдер ал-Абади да ја состави новата влада, на што веројатно жестоко ќе се спротистави досегашниот премиер Нури ал-Малики зад кого стои најголемиот поединечен парламентарен блок, особено откако претходно во понеделникот ирачкиот Уставен суд одлучи дека Масум мора нему да му го довери мандатот, откако за тоа измина законскиот рок, бидејќи парламентарните избори се одржаа уште во април.

Агенциите пренесуваат дека државната ирачка телевизија попладнето емитувала прилог во кој се гледа како претседателот Фуад Масум се ракува со Хајдер ал-Абади и му порачува: „Се надевам дека ќе бидете успешен во формирањето влада на национално единство“.

Абади, пак, веднаш по именувањето ги повика Ирачаните да се обединат против „варварските“ борби што ги води Исламската држава. „Сите мораме да соработуваме за да и’ се спротиставиме на таа терористичка кампања којашто е покрената во Ирак и да ги запреме сите терористички групи“, изјави Абади на државната телевизија, откако претседателот од него побара да го именува владиниот кабинет.

САД веднаш му честитаа на новиот мандатар. „Му честитаме на Хајдар ал-Абади на именувањето и од него бараме да формира влада и програма на националното единство што е можно поскоро“, напиша на својот Twitter Брет Мекгарк, дипломат на американскиот Стејт департмент задолжен за Ирак и за Иран. Тоа укажува на фактот дека Вашингтон и покрај повеќепати декларираниот став оти „не сака да им избира претседател или премиер на Ирачаните“, сепак имал удел во одлуката и изборот на претседателот Фуад Масум, бидејќи го сметаат ал-Малики за делумно виновен за влошените традиционално тензични меѓуконфесионални односи меѓу двете најголеми заедници во земјата – шиитската на којашто самиот и’ припаѓа (над 60 отсто) и сунитската (околу 30 отсто) чиишто припадници се на страната на џихадистите од Исламската држава и во другите радикални бунтовнички групи.

Ал-Абади еден период мина во Велика Британија, образован е на Универзитетот Манчестер, а беше претседател на парламентарната комисија за финансии, политички советник на премиерот и министер за телекомуникации.

Именувањето на ал-Абади за мандатар бездруго ќе наиде на остра реакција на Нури ал-Малики, кој смета дека по пресудата на Уставниот суд, неговата коалиција Правна држава која е најбројната поединечна парламентарна фракција, односно тој има право да го добие мандатот за состав на владата.

Меѓутоа, шиитски челници тврдат дека главната Национална алијанса, којашто има 173 мандата во парламентот, вклучително и оние на Првната држава, е најголемата група и дека таа има право да го именува премиерот. Според нив, за ал-Абади се изјасниле 127 од 173-те пратеници на Националната алијанса.

Малики, кој беше преоден претседател на владата по парламентарните избори во април кои завршија со исход што го проблематизираат некои партии и западот, го отфрли повикот кој го упатија и сунитите и Курдите, но и некои негови сојузници како Иран, да отстапи за да остави простор за личност којашто би била помалку контроверзна.

Шиитските верски лидери и западните сојузници на Ирак последните седмици се придружија во кампањата против ал-Малики, убедени дека попомирлива личност може да го сопре напредувањето на сунитските џихадисти од Исламската држава. Токму него го сметаат за одговорен за чувството на запоставеноста на сунитите, кои инаку како малцинство во времето на диктаторот Садам Хусеин ги имаа во свои раце сите поважни функции во државата за сметка на шиитското мнозинство, а по падот беа истиснати. Сунитите, исто така, на ал-Малики му забележуваат и што Ирак зазема неутрален став во однос на граѓанската војна во соседна Сирија, каде што сунитските вооружени опозициски бунтовници, кои ја имаат поддршката за останатите сунитски земји во регионот и на Западот, се борат да го соборат од власт претседателот Башар ал-Асад, кој доаѓа од алавитската (шиитска) заедница./крај/мф/сн 

Извор: Макфакс