Повеќе од 700 борци на Курдите од северен Ирак се убиени од почетокот на офанзивата на џихадистите од Исламската држава (IS) и другите радикални сунитски групи, од почетокот на нивната офанзива во јуни годинава, објавија во средата властите на автономниот регион ирачки северен Курдистан.

Според прецизираните податоци, од 10-ти јуни по почетокот на офанзивата предводена од Исламската држава, смртно настрадале 721 припадник на курдските милиции пешмергите (оние коишто не се плашат да умрат, во превод, а 3.546 се ранети, објави регионалната курдска влада. Во соопштението што го цитира AFP, се истакнува дека билансот ги вклучува „офицерите, подофицерите, членовите на разузнавачката служба и полицијата, како и пешмергите ветерани“, како и дека 34 припадници на курдските безбедносни сили се водат како исчезнати.

Пешмергите претрпеле тешки загуби во ирачката област Џалавла, каде се наоѓа истоимениот поголем град кон границата со Иран. Според последниот биланс, од 8-ми август таму загинале 150 пешмерги.

Во тие податоци не се вброени и евентуалните жртви на силите на ирачките Курди кои преминаа во Сирија да им помогнат на тамошните сонародници во одбрана на третиот по големина курдски град во оваа земја Кобане (Ајин ал-Араба, на арапски), важен стратешки центар на самата граница со Турција кој веќе четири месеци е под опсада на Исламската држава. Не се вброени ниту курдските жртви во Сирија и оние кои во Ирак и од Сирија дојдоа од Турција. Сепак, генералниот секретар на министерството за пешмергите, Џабар Хавар, изјави дека само 11 курдски борци се ранети во Кобане, додека ниеден не е загинат.

Џихадистите од Исламската држава со ненадејната офанзива на почетокот од јуни заземаа големи области од ирачката територија, и заедно со оние коишто ги контролираат од 2013 година во Сирија, со вкупна површина како Велика Британија, ги прогласија за исламски калифат.

Како и во случајот на сирискиот конфликт, и во Ирак Курдите го искористија појавувањето на бунтот на сунитите и ја преземаа контролата врз некои територии за кои долго се спореа со владата во Багдад, па така за 40 отсто ја зголемија својата територија. Меѓутоа, од дел од таа територија мораа да отстапат, откако Исламската држава ја започна својата втора офанзива во август. Тогаш, џихадистите дојдоа до влезовите во главниот град на ирачки Курдистан Ербил, што го принуди американскиот претседател Барак Обама да ги покрене воздушните напади за поддршка на курдските сили на теренот.

Повеќе земји, од НАТО и од регионот се придружија на воздушната операција предводена од САД, а пешмергите добија помош во оружје и во обука. Со поддршката на коалициските напади, Курдите учествуваа во повторното освојување на неколку сектори, како што е големата брана кај Мосул, вториот по големина град во Ирак, и според соопштението ан властите на Курдистан од средата, сега влегуваат во фаза на контраофанзива.

Истовремено ирачките владини сили од јуни загубиле илјадници припадниц, тврдт Курдите.

Поради насилствата во изминатите шест месеци се раселиле, повеќе од два милиона луѓе, од кои 946.266 се засолнале во Курдистан, според заедничкото соопштението на Обединетите нации и на курдската регионална влада од средата./крај/мф/сн

Извор: Макфакс