Екстремната сунитска организација Исламска држава (IS) заработува милиони американски долари месечно водејќи салони за продажба на автомобили и фарми за одгледување риба во Ирак, со што ги надоместува загубите од продажбата на украдената ирачка и сириска нафта, откако таквата инфраструктура стана цел на насочените руски и американски воздушни удари, соопштија во четвртокот правосудните ирачки власти.

До неодамна експертите проценуваа дека Исламската држава од нафтата и гасот од Сирија и од Ирак годишно добивал во изминатите години по 2,9 милијарди американски долари годишно.

Поради тоа, прво руското воздухопловство во Сирија, а подоцна и воздушните сили на меѓународната коалиција предводена од САД се насочи на уништување на инфраструктурата која придонесува за финансирање на Исламската држава, ограничувајќи ја можноста за црпење, за експлоатација на рафинериите и транспортот на нафтата и гасот до црниот пазар, главно преку Турција, свртувајќи се по тоа, откако и поради офанзивите на ирачките и сириските владини сили ја загуби и контролата на многу нафтоносни полиња, кон нетрадиционалните начини на плаќање на своите борци и финансирање на своите терористички активности.

„Сегашните финансиски механизми на терористите се променија од оние од пред две години кога беше прогласен калифатот“, изјави функционер во ирачкото министерство за правда, пренесува Reuters.

Експлоатирањето на рибниот фонд во стотиците езера и рибници северно од ирачката престолнина Багдад месечно носат милиони долари, покажуваат презентираните документи од централниот истражен суд на Ирак. Џихадистите, исто така, замаат данок на земјоделското земјиште, а се свртеле и кон претприемништво со автомобили, и повторно ги ставиле во погон фабриките во државна сопственост на териториите кои ги држат под контрола во Ирак.

„Даеш (арапската кратенка за Исламската држава во Ирак и на Левантот/Медитеранот – ISIS/ISIL) северната багдадска покраина ја третира како свој финансиски центар. Тоа е нивниот главен извор за финансирање, особено а активностите (терористички) во главниот град“, изјавил судијата Џабар Абид ал-Хушеми, потсетувајќи дека сунитските џихадисти во Багдад редовно извршуваат бомбашки напади врз шиитското мнозинство и безбедносните сили.

Од извештајот, исто така, се дознава и на кој начин ткн министерство за финансии на Исламската држава во Мосул, Бајт ал-Мал, ги дистрибуирало парите во другите покраини надвор од своја контрола.

„Исламската држава испраќала пари на териториите надвор од нејзина контрола преку ткн хавала бирото за трансфер на пари, прво во Ербил, а потоа од Ербил во другите покраини“, појаснува Хушеми.

Освен плати, борците на Исламската држава добиваат и додаток за станарина, надомест за до четврто дете и повремени бонуси, како 1.000 долари награда за борците по заземање на вториот по големина град во Ирак – Мосул во ненадејната офанзива во летото 2014 година.

Организацијата Исламска држава од пред летот 2014 година главно се финансира од криумчарењето на нафтата која ја продава на црниот пазар, продажба на украдени уметнички дела и артефакти, даноци кои му ги наметнува на локалното население, со изнуди од странски влади и од семејства на киднапирани лица.

Американскиот генерал Стивен Ворен на почетокот од јануари на прес-конференцијата во ирачката престолнина Багдад изјави дека воздушните напади ги намалиле приходите на Исламската држава за околу 30 отсто, додека нејзиното производство на нафта паднала од околу 45.000 на околу 34.000 барели дневно. Експертите проценуваа дека до ланскиот октомври џихадистичката група од продажбата на нафтата заработувала по околу 47 милиони долари месечно./крај/мф/сн

Извор: Макфакс