Радикалната сунитска организација Исламска држава се наоѓа под голем притисок откако во четвртокот пое покренати две големи офанзиви врз нејзините упоришта во сирискиот град Палмира и во ирачкиот град Мосул, три дена по нападите во Брисел за кои одговорноста ја презема оваа џихадистичка групација.

Обидувајќи се да го запрат сирискиот судир кој го поттикна јакнењето на Исламската држава која покажа дека е способна да изврши големи смртоносни терористички напади и во Европа, Русија и САД ветија дека ќе се заложат за носење побрзо политички решение по едномесечното примирје. Во швајцарска Женева, каде што заврши првиот круг од индиректните меѓусириски преговори меѓу владата и опозицијата, специјалниот пратеник на ОН за Сирија, Стефан де Мистура, најави дека тие ќе продолжат околу 9-ти или 10-ти април.

Сириската армија која на теренот ја помагаат локалните милиции, шиитското либанско движење Хезболах, доброволци од Ирак и Иран, како и инструктори за специјалните сили од Иран и од Русија, а од воздух ја има поддршката на руската авијација, влезе во Палмира во четвртокот и во петокот веќе беа објавени првите снимките од градот од кој се потиснуваат борците на Исламската држава.

Сириската артилерија во четвртокот ноќта ги гранатирала џихадистичките позиции, додека пешадијата запре со напредувањето кое го продолжи во петокот утрото, поради опасноста од снајперистите кои се поставени во заседи. Русија објави дека извршила 146 воздушни удари во последните три дена врз терористичките позиции во оваа област којашто Исламската држава ја контролира од мај 2015 година.

Сириските владини единици кои на 7-ми март започнаа офанзива, влегоа во Палмира од југозапад, меѓутоа напредуваат „забавено поради мините“, кои ги поставија џихадистите изјави за AFP Рами Абделрахман, директор на опозициската Сириска опсерваторија за човекови порава (SOHR) со седиште во Лондон, кој се повикува на активисти на теренот.

Според податоците на SOHR, 40 џихадисти и осум владини војници загинале во последното деноноќие во Палмира, град стар повеќе од две илјади години кој е ставен на списокот на УНЕСКО на светското културно наследство, во кој Исламската држава веќе уништи голем број археолошки споменици.

Главната директорка на УНЕСКО, Ирина Бокова, изјавила дека нејзината организација е подготвена „штом безбедносните услови тоа ќе го дозволуваат, заедно со сириските челници за културно и археолошко наследство да излезат на терен и да ги проценат штетите и да ги заштитат непроценливите културни блага на Палмира“.

Од другата страна на границата, ирачката армија со поддршка на локалните милиции и воздушните удари на меѓународната коалиција предводена од САД, започна офанзива за ослободување на Мосул, вториот по големина град во Ирак, Заземањето на Мосул, коешто може според воените стратези да биде тешко, се смета за пресуден за ослободувањето на територијата којашто ја зазема Исламската држава во Ирак со ненадејната офанзива во пролетта 2014 година.

Мосул, и сириските градови Палмира и Рака, се најголемите градови во таканаречениот калифат кој во јуни 2014 година го прогласи челникот на Исламската држава, Абу Бакр ал-Багдади.

По повеќе од четири часа разговор на американскиот државен секретар Џон Кери во четвртокот во текот на неговата дводневна посета на Москва со рускиот претседател Владимир Путин на која присуствуваше и шефот на дипломатијата Сергеј Лавров, Русите и Американците се обврзаа дека ќе го искористат моменталното примирје меѓу владините сили и вооружената сунитска опозиција за да се обидат да пронајдат политичко решение за сирискиот конфликт.

„Согласни сме дека до август е неопходно да се одредат роковите за политичката транзиција и нацртот на сирискиот устав“, рече Кери по средбата. Лавров, пак, ја истакна важноста од „директните преговори меѓу владината делегација и целата низа сириски опозициски групации“/./крај/мф/сн

Извор: Макфакс