САД и Куба во четвртокот ги продолжуваат преговорите за обновување на дипломатските односи по повеќе од половина век прекин, откако во средата во острите дебати на двете страни по прашањето на кубанската имиграција на виделина излегоа сите тешкотии и пречки во надвладување на непријателствата.

Највисоката американска делегација којашто во последните 35 години од повремените преговори престојувала во кубанската престолнина Хавана, во четвртокот ја приведува при крај својата посета, а САД и Куба истакнаа дека не треба веднаш да се очекува голем напредок во надминувањето на различните ставови.

Високи американски функционери изразија надеж дека Куба во претстојните месеци ќе се согласи на повторното отворање на амбасадите и именување амбасадори во Хавана и во Вашингтон. САД, исто така, бараат на американските дипломати да им се укинат ограничувањата за патувањата, како и да им биде овозможено непречено примање на пратки во нивната мисија во Хавана.

Во текот на преговорите во средата, Американците ветија дека ќе продолжат да им даваат засолниште на Кубанците и посебна заштита која не ја уживаат доселениците од другите земји. Куба, имено, се жалеше на американскиот закон кој ја поттикнува опасната илегална имиграција, и протестираше против специјалната американска програма којашто ги охрабрува кубанските лекари да пребегнуваат во САД, нарекувајќи го тоа „срамотна практика за одлевање мозоци“.

Првиот круг од преговорите, посветен во средата на ревизијата на договорот за миграцијата потпишан во 1994 година, претставуваше можност двете земји да ги потврдат своите ставови.

На состанокот за имиграцијата присуствуваше и помошничката на американскиот државен секретар за западната хемисфера и првата личност на дипломатските односи Роберта Џејкобсон, со што стана првата висока американска функционерка која стапнала на карипскиот остров на кој власта е во рацете на комунистичката партија по 1980 година.

Кубанската страна во разговорите, пак, ја предводи директорката за американски работи во кубанското министерство на надворешни работи, Жозефина Видал, којашто, исто така, учествуваше во преговорите по имиграциското прашање.

Во рамките на приближувањето меѓу двете земји, Белата куќа во средата наведе дека на американските пратеници ќе им го претстави предлогот за укинување на трговското и финансиското ембарго за Куба. Минатата седмица Вашингтон укина низа трговски и ограничувања за патувањата. Хавана, за возврат, ослободи 53 политички затвореници од листата што и’ ја доставија САД.

И покрај отпоров во Конгресот на САД, каде што мнозинство имаат републиканците, демократскиот претседател Барак Обама е упорен по прашањето на укинувањето на економските санкции и 53-годишното трговско ембарго против Хавана. Американскиот државен секретар Џон Кери изјави дека се радува на официјалното отворање на американската амбасада на Куба. Исто така, изрази подготвеност, но „кога за тоа ќе дојде времето“, за средба со својот кубански колега Бруно Родригез.

Сегашната средба на високите претставници е првата откако претседателите Барак Обама и Раул Кастро на 17-ти декември најавија дека ќе работат на обновувањето на дипломатските односи коишто САД одненадеж и без предупредувања ги прекина во 1961 година./крај/мф/сн

Извор: Reuters