Поранешниот израелски премиер Ехуд Олмерт е осуден во понеделникот пред судот во Ерусалим на осум месеци строг затвор поради корупција, објавија тамошните медиуми.

Адвокатите на сега 69-годишниот Ехуд Олмерт, кој беше премиер на Израел во периодот од 2006 година до 2009 година, веднаш најавија дека ќе вложат жална, што го одложува извршувањето на казната.

Инаку Олмерт е прогласен за виновен на 30-ти март, бидејќи примал и криел коверти со десетици илјади американски долари од американскиот бизнисмен Морис Талански. Според обвинувањето, Олмерт злоупотребил најмалку 150.000 од 600.000 долари колку што му исплатил Талански.

На поранешниот израелски премиер веќе му се заканува шестгодишна затворска казна во рамките на друга афера за корупција којашто во моментов е на разгледување во Врховниот суд.

Ехуд Олмерт кон половината на мај 2014 година беше осуден на шест години затвор поради корупција во големата афера „Холиленд” со недвижнини во периодот додека беше градоначалник на Ерусалим, од 1993 до 2003 година, објавија израелските медиуми кои оценуваат дека со тоа се урнати сите шанси тој повторно да се врати во политиката. Освен што е осуден на шестгодишна затворска казна, треба да плати парична глоба од милион израелски шекели, или 210.000 евра.

Со тоа Олмерт стана првиот политичар во израелската историја кој е осуден на реална затворска казна, и доколку не не мине жалбата пред Врховниот суд, ќе биде највисокиот функционер затворени во земјата.

Центристот Олмер, кој како израелски премиер се стекна со меѓународно реноме поради неговите напори за постигнување мир со Палестинците, ја отфрли целата вина во аферата „Холиленд”, комплекс станови. Во пресудата за случајот „Хололенд“ на 50 страници, судијата истакна дека Олмерт, и покрај неговите заслуги за државата, извесно време учествувал во криминални врски и ја искористил службената положба за здобивање со големи парични износи. Казната беше изречена месец ипол откако судот докаже дека Олмерт добил најмалку 560.000 шекели, околу 100.000 евра за помош при реализацијата на проектот за изградбата. Инаку, беше обвинет за примање 759 милиони шекели, или 156.000 евра. Поранешниот градоначалник на Ерусалим не ја признава вината, а неговите адвокати бараа затворска казна од година пол.

Поранешен адвокат, голем љубител на елегантни костуми, скапи цигари, фудбал, добра храна и патувања во странство, Олмерт честопати беше цел на истраги на израелските правосудни органи, но секогаш досега се извлекуваше.

Политичкиот пад на Олмерт започна во септември 2008 година која ослабен поради обвинувањата за корупција но функцијата ја извршуваше до крајот март 2009 година, одби да се кандидира на внатрепартиските избори на својата партија Кадима, од десниот центар, со што всушност отстапи од премиерската функција и беше заменет од актуелниот премиер Бенјамин Нетанјаху.

Олмерт кариерата ја започна како националист во партијата Ликуд за со времето да еволуира кон умерената струја. Така, во почетокот го поддржуваше големиот Израел и екстремните доселеници на палестинските територии на Западниот брег (на регата Јордан) и во појасот Газа, се спротиставуваше на договорите од Кемп Дејвид со Египет од 1978 година, како и на договорот од Осло со Палестинците од 1993 година, за конечно да се согласи со замислата за основање палестинска држава.

„Најубавиот ден во мојот живот беше денот која открив дека бројките се посилни од историјата и географијата на Израел. Открив дека ако тврдоглаво истрајуваме на тоа да задржиме сé, во 2020 година ќе има 60 отсто Арапи и 40 отсто Евреи на територијата на Палестина”, призна Омерт пред неколку години.

Во своите мемоари објавени во 2013 година, поранешната американска државна секретарка Кондолиза Рајс, призна дека се изненадиле кога Олмерт во мај 2008 година тајно и’ предложил на Палестинците да им се вратат 94 отсто од територијата на Западниот брег и да се подели Ерусалим за да стане престолнина на двете држави, еврејската и палестинската.

Олемрт ја водеше изралеската влада од 2006 година, откако неговиот претходник и партиски колега Ариел Шарон доживеа мозочен удар и падна во долгогодишна кома. Тригодишното премиерство на Олмерт кој подоцна се декларираше и како политичар од левиот центар, беше карактеризирано со заживувањето на изралеско-палестинските мировни преговори, како и со Сирија, со Втората либанска војна којашто повеќето Израелци ја сметаат за пораз, и големите операции во палестинската енклава појасот Газа, кога загинаа повеќе од илјада Палестинци./крај/мф/сн

Извор: Макфакс