Израел одлучи да го замрзне месечниот пренос од 106 милиони евра даноци за Палестинската самоуправа откако нивниот претседател Махмуд Абас поднесе барање за пристапување на Меѓународниот кривичен суд (МСК – ICC) со што се создава можноста да тужат израелски челници за воени злосторства, а палестинскиот преговарач Саеб Ерекат ваквиот потег го нарече „воено злосторство“.

Израелскиот премиер Бенјамин Нетанјаху одлучи по консултациите со своите министри да го замрзне планираниот месечен трансфер на околу 500 милиони израелски шекели, околу 106 милиони евра, за Палестинците. Овие пари се важни за Палестинската самоуправа за исплата на јавните служби и работа на владата.

Ова е прва израелска противмерка откако палестинскиот претседател Махмуд Абас во петокот пред Обединетите нации поднесе барање за членство во Меѓународниот кривичен суд (МСК – ICC) и други меѓународни договори, што Израел го нарече едностран потег кој ги закочува мировните преговори.

„Ова е ново воено злосторство и немаа да им подлегнеме на притисоците“, порача палестинскиот преговарач Саеб Ерекат, по објавувањето на израелската мерка.

Откако во 1993 година беа донесени Спогодбите од Осло за Палестинската самоуправа, Израел собира данок за неа и секој месец и’ го доставува. Тие средства сочинуваат половина од палестинскиот буџет.

Палестинското министерство за финансии најави дека самоуправата ќе има тешкотии во исплаќањето на јавните службеници поради замрзнувањето на средствата. Палестинскиот премиер Рами Хамдалах уште во петокот предупреди дека Израел доцни со исплатата.

Палестинската самоуправа, во согласност со Римскиот статут, би станале странка на МКС во рок од 60 дена по предавањето на барањето. Пополнувањето на барањето за пристапување, кое ги разлути Израел и САД, би му овозможила надлежност ана судот за злосторства сторени на палестинските територии и истрага над палестински и над израелски челници в о повеќедеценискиот конфликт. Ниту Израел, ниту САД не се потписнички на Римскиот статут и членки на Хашкиот трибунал.

Американските функционери предупредија дека палестинското барање за членство во судот чија делокруг е прашањата на воени злосторства и злосторства против човечноста, може да ја загрози помошта од околу 400 милиони долари на годишно ниво.

Освен членството во МКС, Палестинците бараат и статус на потписници на Конвенцијата на ОНА против меѓународно организирано злосторство, Конвеција за право на морето, два дополнителни протокола од Женевската конвенција и Конвенција за касетната муниција .

Нетанјаху претходно седмицава го повика МКС да го отфрли палестинското барање за членство.

Абас ги поднесе барањата до МКС и ОН откако Палестинците, кои во 2012 година го добија статусот земја нечленка набљудувач во ОН. сакаа во Советот за безбедност на ОН да ја протуркаат резолуцијата со којашто во рок од една година би бил постигнат мировен договор со Израел кој потоа во рок од две години би се повлекол во границите од пред војната од 1967 година, односно до Западниот брег (на реката Јордан) и од источен Ерусалим, територии кои меѓународната заедница ги смета за окупирани палестински земји. По повеќе притисоци Палестинците на крајот предадоа изменет текст за кој гласаше Франција.

Текстот во вторникот беше одбиен, најмногу благодарејќи на лобирањето на САД кои се најголемиот сојузник на Израел. Советот за безбедност на ОН ја отфрли палестинската резолуција со осум гласови „за“, два „против“ и пет воздржани, а за усвојување беа потребни девет гласови. Русија, Кина и Франција, како постојани членки на Советот ја поддржаа резолуцијата против којашто жестоко лобираше Вашингтон. Австралија и САД, гласаа против. Пет држави, меѓу кои Велика Британија, која е постојан член на СБ на ОН и американски сојузник, беа воздржани.

Израелците палестинскиот чекор го нарекоа нож со две сечила, и најавија дека и тие би можеле да обвинат палестински челници, во прв ред исламистичкото движење Хамас коешто владее со енклавата Појасот Газа и кое е ставено на листата терористички организации во Израел и САД, додека во Европската унија е покренат процесот за симнување од таа листа.

Израел го обвинува Хамас дека се користел со цивили како „човечки штит“ во текот израелската офанзива врз појасот Газа во јули/август 2014 година, oХамас тврди дека Израел со нападите врз цивилите во текот на 50-дневната војна во јули и август минатата година, извршил воени злосторства. Во војната во Газа беа убиени околу 2.200 Палестинци, претежно цивили од кои стотина деца, според болнички извори од Газа, додека на страната на Израел се пријавени 73 жртви од кои шест цивилни./крај/мф/сн

Извор: Макфакс