Најмалку дваесет Палестинци се убиени во израелското бомбардирање на квартот Шеџаија во Газа од каде во неделата бегаат илјадници жители, на 13-от ден од офанзивата против палестинското исламистичко движење Хамас кој ја контролира палестинската енклава Појасот Газа каде што израелската армија којашто во саботата загуби уште два војника ја засилува копнената офанзива со што нејзините загуби се искачија на вкупно седум, додека бројката на палестински жртви се приближува до 400. 

Во израелското бомбардирање во неделата се убиени најмалку дваесет Палестинци во споменатата источна населба на градот Газа, пренесува Reuters повикувајќи се на болнички извори и очевидци. Во извештајот се додава дека болницата „Шифа“ во Газа е преполна со ранети довезени токму од квартот Шеџаија, која е оддалечена три километра.

Репортерите на AFP пренесуваат дека многу тела лежат на улиците, а екипите на медицинските екипи не можат да им пријдат поради интензивниот оган од израелските тенкови. Се додава дека палестинската телевизија al-Ketab прикажува грозоморни снимки на изгорени и растргани човечки тела, меѓу кои има и деца.

„Во копнената операција ’Линија на одбраната’ се вклучуваат дополнителни сили поради сузбивањето на тероризмот во Појасот Газа и воспоставување на сигурноста“, се истакнува во соопштението на израелската армија објавено во неделата. Израелската команда во неделата потврди дека загубила уште двајца војници во борбата при одбивањето на палестински специјален вод кој преку тунел влегол на територијата на Израел од центарот на Појасот Газа. Така, досега во речиси двете седмици борбени дејствија загинаа вкупно пет војници а 17 се ранети, покрај двете жртви од палестинските ракетирања на јужните делови од Израел, 400-те хоспитализирани од кои 283 биле во состојба на шок без телесни повреди.

Во Газа во неделата пред операцијата во Шеџаија каде што живеат 200 илјади жители од кои 40 илјади ја напуштиле населбата, биле убиени 12 Палестинци, така што бројот загинати изнесува над 370 луѓе, а ранети се повеќе од три илјади лица од почетокот на израелската офанзива на 8-ми јули. Според податоците на Обединетите нации меѓу загинатите и ранетите повеќе од три четвртини се цивили, додека УНИЦЕФ истакнува дека се убиени најмалку 73 малолетници.

Обединетите нации наведуваат дека во Газа примиле досега 62 илјади раселени, што е веќе поголем број од оној во судирот од ноември 2008 до јануари 2009 година, кога беа убиени повеќе од 1.400 Палестинци и стотина Израелци.

Израелската армија соопшти дека во саботата од позиции на палестинските милитанти биле истрелани 130 ракети, од кои 20 биле насочени кон Тел Авив. Според податоците од службата за односи со јавноста на Армијата за одбран на Израел (ЦАХАЛ), од почетокот на копнената фаза на операцијата во Појасот Газа биле убиени најмалку 130 Палестинци, од кои 110 биле активисти на радикални движења и организации, пренесува Итар-Тасс. За време копнената операција војската уништила 40 подземни тунели, поврзани со местата од кои се истрелуваат проектилите, како и складишта со оружје и командни центри. Токму уништувањето на овие тунели е објавената цел на израелската копнена операција.

Претседателот на палестинската самоуправа Махмуд Абаз во неделата во Доха би требало да се сретне со шефот на Хамас во егзил Калед Мешал, според палестински извори блиски до Абаз. Хамас, кој во вторникот го одби египетскиот предлог за примирје, во саботата навечер ги предаде своите услови за примирје на Египет, Катата, Турција, Арапската лига и на претседателот Абаз, откако не успеа иницијативата на шефот на француската дипломатија Лорен Фабиус по неговите разговори со израелскиот премиер Бенјамин Нетанјаху и претставници на палестинските милитанти.

Условите за примирје на Хамас се прекин на агресијата кон палестинскиот народ, целосно укинување на блокадата на Појасот Газа од копно, море и воздух која трае од 2006 година, отворање на преминот Рафах на границата со Египет, слобода на движењето на населението на Газа покрај границата со Израел, укинување на „тампон зоната“ на границата каде е забранет пристапот за палестинското население на Газа, која инаку е пренаселена со 1,8 милиони жители, овозможување за рибарење на 12 поморски милји од брегот на Газа, како и ослободување на палестинските затвореници кои беа ослободени во рамките на договорот за ослободување на израелскиот војник Гилад Шалит во 2011 година, повторно затворени по киднапирањето и убиството на тројцата израелски тинејџери во другата палестинска енклава Западниот брег./крај/мф/сн

Извор: Макфакс