Припадник на џихадистичката групација Исламска држава (IS) кој минатата седмица бил заробен од американските специјални сили во Ирак, бил експерт за хемиско оружје, тврдат двајца високо рангирани американски функционери, а информацијата ја потврдуваат и извори од ирачкото разузнавање.

Лицето, чиј идентитет официјално не е соопштен, го уапсиле американските специјалци кои неодамна Пентагон ги распоредил за водат копнени акции на локалните сили против Исламската држава во Ирак, рекол еден од изворите. Двајцата потврдиле дека станува збор за „стручњак за хемиско оружје“, пренесува AFP.

Уапсениот моментално се наоѓа во Ирак. Според извори од ирачкото разузнавање, станува збор за водач на единица на Исламската единица, кој бил одговорен за развој на хемиско оружје, а бил уапсен во операција во февруари во северниот дел на земјата.

Според телевизијата мрежа CNN, информациите кои ги дал заробеникот, за кој мрежата NBC News тврди дека се вика Слеиман Дауд ал-Афари, овозможиле да се изведат воздушни напади „врз цели кои се сметаат за клучни во програмата за развој на хемиско оружје на Исламската држава“.

Функционер на Пентагон ноќта кон четвртокот не го потврдил заробувањето, но изјавил дека „Ние знаеме дека Исламската држава користела во повеќе наврати хемиско оружје во Сирија и во Ирак“.

Двајца ирачки разузнавачки функционери, кои сакале да останат анонимни, исто така, уапсениот го идентификувале како Слеиман Дауд ал-Афари, кој порано работел во воената индустрија на ликвидираниот сунитски ирачки диктатор Садам Хуен, пренесува Press TV.

Ирачките извори тврдат дека 50-годишниот ал-Афари бил специјалист за хемиско и за биолошко оружје, и бил на чело на од скоро формираната единица на Исламската држава за развој на хемиско оружје. Тој бил заробен во текот на напад во близина на градот Тал Афат.

Спорен некои сознанија, Исламската држава на областите коишто ги контролира во Ирак се обидува да произведе хемиско оружје и се верува дека формирала специјални тимови на коишто им е доверена таа задача. Се верува, исто така, дека во овие тимови се вклучени ирачки научници кои работеле на оваа програма во ерата на Садам Хусеин, како и странски експерти кои ѝ се приклучиле на оваа сунитска терористичка група.

Ирачките и американските војски се обидуваат да ги лоцираат евентуалните хемиски лаборатории во кои џихадистите би можеле да произведуваат оружје за масовно уништување.

Исламската држава, според некои претходни извештаи, користела хемиски агенси на боиштето во Ирак, како и во соседна Сирија. Сепак, експертите велат дека терористичката група не може да изведе поголем напад со хемиско оружје, зашто за тоа е неопходна соодветна специфична опрема. материјали и синџир за снабдување со неопходните супстанции за да се развие хемиски агенс.

„Мислам дека Исламската држава не може да изведе повеќе од симболичен напад“, коментира Дан Кашчета поранешниот американски офицер, хемиски експерт во Департментот за татковинска безбедност.

Ирачкиот министер за одбрана Калед ал-Обаиди смета дека Исламската држава нема „хемиски капацитети“, и оти нивните напади имале цел само „да влијаат врз моралот на нашите борци“./крај/мф/сн

Извор: Макфакс