Шиитските бунтовници од племето Хути напредуваа во неделата кон пристанишниот град Аден, втор по големина во Јемен, и покрај воздушните од страна на коалицијата на арапските сунитски држави од Персискиот залив предводени од Саудиска Арабија од која Русија побара прекин на нападите од хуманитарни причини, бидејќи најголем број од жртвите се цивили.

Истовремено шиитски Иран од султанатот Оман побара да помогне воздушните напади веднаш да бидат прекинати, пишуваат иранските медиуми. Оман, кој е во добри односи со Техеран, е единствената монархија во Персискиот залив која не учествува во коалицијата која собра десет арапски земји.

Меѓутоа, и покрај воздушните удари кои започнаа на 26-ти март, шиитските бунтовници чија племенска милиција „Ансар Алах“ уште на почетокот од минатиот месец го зазема главниот град Сана и области на северот и во централниот дел од земјата, напредуваат кон Аден, откако во неделата ја заземаа зградата на покраинската управа и се приближуваат кон пристаништето, изјавил за AFP локален функционер, лојален на владата на претседателот Абд Раба Мансур Хади, кој откако ја напушти Сана се префрли во Аден, но од минатата седмица пребега во Саудиска Арабија.

Хутите, се сојузници со силите лојални на претседателот Али Абдулах Салех кој мораше во 2012 година да се повлече во власта по бунтовите од ткн Арапска пролет кои го зафатија и Јемен во 2011 година. Арапските медиуми наведуваат дека Хутите бомбардирале и некои станбени населби во Аден, што е првпат да има такви извештаи, при што според очевидци запалиле повеќе домови, поради што десетици семејства морале да побегнат. Коментирајќи ги овие бомбардирања, портпаролот на сунитската арапска коалиција, саудискиот генерал Ахмед Асири, ги обвини Хутите дека „спроведуваат терор над цивилите“.

Телевизиската станица Aden TV, која е лојална на претседателот Хади, била изложена на гранатирање, коешто, исто така, им се припишува на бунтовниците, што ја принудило да го прекине емитувањето на програмата. „Зградата е оштетена, но нема човечки загуби“, рекол за AFP директорот на телевизијата.

Според прелиминарниот извештај од неделата, пет цивили загинале а 14 се ранети во судирите меѓу Хутите и приврзаниците на Хади во две населби во близина на редакцијата на телевизијата. „Меѓу ранетите има и деца“, изјави директорот на здравствената служба, Ал Хадер Ласуар.

Бунтовниците во четвртокот ја заземаа претседателската палата во Аден, но во петокот рано утрото се повлекоа од комплексот поради воздушните напади на коалицијата.

Многу земји во светот, меѓу кои Русија, Индија, Индонезија и Пакистан, ги евакуираа деновиве своите државјани, а Кина, Џибути и Судан тоа требаше да го сторат во неделата, додаде саудискиот генерал Асири. Меѓутоа, портпаролот на коалицијата во своето обраќање до медиумите во неделата изјави дека Меѓународниот комитет на Црвениот крст, кој во неделата требаше во главниот град Сама да испрати авион со хуманитарна помош, побарал таа операција да биде одложена. Хутите, кои го контролираат аеродромот во Сана, не дозволиле испраќање други авиони за евакуација на странските државјани, особено Суданците, додаде.

Со брод на француската воена морнарица во саботата 44 лица од повеќе земји беа евакуирани од пристаништето Балхар, 380 километри источно од Аден. Тие патуваат кон Џибути, соопшти француското министерство за одбрана.

Турција евакуирала во неделата од Сана со авион 230 луѓе, меѓу кои и странски државјани, кои се упатени кон Истанбул, објави на Twitter, шефот на турската дипломатија, Мевлут Чавушоглу. Во евакуацијата се ангажирани турските поморски сили, турски дипломати и претставници на воздухопловната компанија „Turkish Airlines“, како и дека со неа биле опфатени 185 државјани на Турција и 45 странци, прецизира весникот Sabah. Претходно во петокот Анкара со брод од Аден во Џибути евакуираше 55 свои граѓани, кои потоа со авион се префрлија во Турција.

Во неделата навечер и Пакистан соопшти дека сепак успеал од Јемен да евакуира 134 луѓе. Во авионот кој слетал во Исламабад доцна вечерта, имало 134 Пакистанци, двајца Канаѓани и двајца Суданци, пренесува Reuters. Досега Пакистан од Јемен евакуирал 850 свои граѓани.

Индија соопшти дека евакуирала 440 свои државјани, како и дека во Јемен може да се наоѓаат околу четири илјади индиски државјани. Се додава и дека за Њу Делхи ова е четврта евакуација на свои граѓани од зоните на конфликти за нецела година, откако такви операции претходно беа преземени во Украина, Ирак и Либија.

Додека низ земјата се шири насилството, бидејќи на спротивната страна од Јемен напредува и терористичката Ал Каеда на Арапскиот полуостров, невладините организации изразуваат загриженост поради хуманитарната ситуација и големиот број цивилни жртви. Според официјалните податоци кои Обединетите нации ги објави во неделата навечер, од 19-ти март досега во Јемен загинале најмалку 549 луѓе, а 1.707 се ранети. Од нив најмалку 217 се убиени цивили и 516 се ранети, од кои најголем број се од двојниот самоубиствен бомбашки напад на сунитските радикали врз две шиитски џамии во Сана на 20-ти март./крај/мф/сн

Извор: Макфакс